Binjaket që lindën me pak minuta diferencë – por me baballarë të ndryshëm

Historia e Michelle dhe Lavinia Osbourne sfidon çdo pritshmëri mbi lidhjen mes binjakëve. Të lindura brenda pak minutash nga e njëjta nënë, ato zbuluan pas dekadash se nuk ndajnë të njëjtin baba, për shkak të një fenomeni biologjik jashtëzakonisht të rrallë. Ky zbulim tronditës ndryshoi mënyrën si e shihnin veten dhe familjen e tyre, por nuk arriti të thyejë lidhjen e fortë që i ka bashkuar gjithmonë.

Binjaket Michelle dhe Lavinia Osbourne kanë pasur gjithmonë një lidhje të veçantë mes tyre.

Por kur Lavinia klikoi mbi një email me rezultatet e një testi ADN-je të bërë në shtëpi në shtator të vitit 2022, ajo u mbush me një ndjenjë frike.

“Ndoshta në mënyrë të pavetëdijshme e dija”, thotë ajo.

Rezultatet e testit të saj zbuluan diçka tronditëse: binjaket jo-identike Lavinia dhe Michelle nuk kanë të njëjtin baba.

Ato u zhvilluan së bashku në të njëjtën mitër dhe lindën nga e njëjta nënë brenda pak minutash nga njëra-tjetra - por ato janë motra nga nëna, me baballarë të ndryshëm.

Michelle dhe Lavinia, 49 vjeç, ekzistojnë falë një procesi biologjik jashtëzakonisht të rrallë të quajtur heteropaternal superfekundim. Që kjo të ndodhë, një grua duhet të prodhojë më shumë se një vezë gjatë të njëjtit cikël, këto vezë duhet të fekondohen me sukses nga spermatozoide të burrave të ndryshëm, dhe embrionet që formohen duhet të mbijetojnë gjatë shtatzënisë.

Vetëm rreth 20 raste janë identifikuar në të gjithë botën. Pas muajsh kërkimesh mbi historinë e tyre për serinë e BBC Radio 4, “The Gift”, gazetarja ka zbuluar se Lavinia dhe Michelle janë i vetmi çift binjakësh me baballarë të ndryshëm që është dokumentuar ndonjëherë në Mbretërinë e Bashkuar.
Për Lavinian, ky zbulim ishte shkatërrues. Ajo dhe Michelle kishin kaluar një fëmijëri të vështirë, ku shpesh lëviznin nga një shtëpi në tjetrën dhe nga një kujdestar te tjetri. E vetmja gjë e qëndrueshme që kishin këto binjake jo-identike ishte njëra-tjetra.

“Ajo ishte e vetmja gjë që më përkiste mua, e vetmja gjë për të cilën isha e sigurt, e vetmja gjë për të cilën nuk kisha dyshime”, thotë Lavinia. “Dhe pastaj doli që nuk ishte ashtu”.

“Unë dhe ajo kundër botës”

Por kur Lavinia i telefonoi motrës së saj binjake për t’i treguar lajmin, Michelle reagoi ndryshe.

“Nuk u habita”, thotë Michelle. “Ende më duket e pabesueshme që kjo mund të ndodhë - është shumë e çuditshme, shumë e pazakontë, jashtëzakonisht e rrallë - por ka kuptim”.

Nëna e Michelles dhe Lavinias ishte një vajzë e pambrojtur 19-vjeçare kur i lindi ato në Nottingham në vitin 1976.

“Ajo kishte vuajtur abuzim nga njerku i saj”, thotë Michelle. “Nëna ime kishte kaluar herë në familje kujdestare dhe herë në shtëpi fëmijësh gjatë gjithë fëmijërisë së saj”.

Sa herë që binjaket pyesnin se kush ishte babai i tyre, nëna e tyre gjithmonë thoshte se ai ishte një person i quajtur James. “Ai nuk ishte pjesë e jetës sonë”, vazhdon Michelle.

Edhe nëna e tyre mungonte për pjesën më të madhe të jetës së tyre. Kur ato ishin pesë vjeç, ajo fitoi një vend për të studiuar në universitet në Londër dhe i la fëmijët në Nottingham me nënën e shoqes së saj më të mirë, të cilën binjaket e quanin “gjyshe”.

“Gjyshja ishte e rreptë - jo shumë emocionale, jo shumë përkëdhelëse. E vetmja gjë e qëndrueshme që kisha ishte Michelle”, thotë Lavinia.

Për sa kohë që kishte binjaken e saj, Michelle thotë se ndihej e sigurt.

“Ishim ajo dhe unë kundër botës.”

Në moshën 10-vjeçare, vajzat u bashkuan me nënën e tyre në Londër. Por brenda pak vitesh, Lavinia dhe Michelle u dërguan përsëri larg, për të jetuar në një nga familjet kujdestare ku nëna e tyre kishte jetuar më parë. Ato nuk arrinin të kuptonin pse nëna e tyre dëshironte të mbante një distancë prej tyre.
“Fizikisht dhe emocionalisht, ajo ishte gjithmonë e paarritshme për ne”, thotë Lavinia.
Pasi kishte munguar për pjesën më të madhe të fëmijërisë së tyre, James u rikthye në jetën e tyre kur binjaket ishin në mesin e adoleshencës. Lavinia arriti ta gjente - dhe ndërsa ajo mendonte se shihte ngjashmëri me të, Michelle nuk ishte kurrë e sigurt se ai ishte babai i saj. Thellë brenda saj, kishte dyshime të vazhdueshme.

Nga fundi i vitit 2021, nëna e tyre vuante nga demenca me fillim të hershëm dhe nuk ishte më në gjendje t’u përgjigjej pyetjeve të tyre. Michelle pa një fotografi të Jamesit dhe u bind edhe më shumë se ai nuk mund të ishte babai i saj.

“Thjesht mendova: ti nuk ngjan aspak me mua”, thotë Michelle. “Kështu që bleva një test për veten time”.

Nëse bën një test ADN-je, zbulon të vërteta jo vetëm për veten, por edhe për familjen tënde. Por Michelle nuk mendoi se si rezultatet e saj mund të ndikonin te Lavinia kur dërgoi mostrën për analizë. Rezultatet mbërritën më 14 shkurt 2022 – në të njëjtën ditë kur nëna e Michellet dhe Lavinias ndërroi jetë.

Njohja me baballarët

Mbiemri i Jamesit nuk shfaqej në linjën atërore të Michellet - ai nuk ishte babai i saj.

Pas javësh kërkimesh, Michelle zbuloi se babai i saj ishte Alex, vëllai i një gruaje që kishte qenë shoqe me nënën e tyre. Michelle kontaktoi disa nga familjarët e Alexit, të cilët e paralajmëruan se ai kishte luftuar për vite me radhë me alkoolizmin dhe varësinë nga droga, dhe se jetonte në rrugë.

Michelle dhe Lavinia u takuan me një grua të quajtur Olivine, për të cilën Michelle besonte se ishte kushërira e tyre e parë nga ana e babait. Michelle ndjeu menjëherë një lidhje me të.

“Thjesht e dija që ishte gjak i imi”, thotë ajo. Por Lavinia nuk ndjeu të njëjtën gjë. Dhe kur Olivine nxori fotografi të familjes së saj, Lavinia nuk e pa veten në fytyrat e tyre.

Lavinia vendosi të bëjë edhe ajo një test ADN-je. Ajo nuk priste të merrte një rezultat ndryshe nga Michelle, por duhej të bënte diçka për ndjenjat në rritje të pasigurisë që familja e Alexit nuk ishte e saja.

“Thjesht doja konfirmim”, thotë ajo.

Kur hapi rezultatet dhe pa të vërtetën tronditëse se binjakja e saj ishte në fakt motra e saj nga nëna, Lavinia u shkatërrua - dhe u zemërua.

“Isha e zemëruar me Michellen që më bëri të kaloja nëpër këtë, sepse unë thjesht nuk doja këtë realitet”.

Dhe kishte edhe më shumë zbulime për të ardhur. Kur Lavinia i shqyrtoi me kujdes rezultatet e saj, pa se as James nuk ishte babai i saj.

Lavinia nuk kishte interes të zbulonte se kush ishte babai i saj, por Michelle ishte e vendosur të gjente përgjigje. Duke analizuar rezultatet e binjakes së saj, Michelle gjeti Arthurin, babanë biologjik të Lavinias. Binjaket shkuan ta takonin në shtëpinë e tij në Londrën Perëndimore.

“Ai ishte paksa nervoz, por ka një karakter shumë të gjallë - si unë”, thotë Lavinia. Në fund të takimit të tyre, ajo e puthi Arthurin në faqe.
“Thjesht u ndjeva e tërhequr për ta bërë këtë”.

Që atëherë, Lavinia dhe Arthur kanë qenë shumë të afërt, duke u takuar disa herë në muaj, shpesh edhe me Michellen.

“Ndjej sikur kam gjetur një vend ku i përkas, dhe ai vend është me babanë tim”, thotë Lavinia. Ai i ka thënë edhe Michelles se edhe ajo mund ta quajë atë “Baba”.

Në një takim të mëvonshëm, binjaket e pyetën Arthurin se çfarë dinte për mënyrën se si ato kishin lindur.

“Ai tha: ‘Nëna juaj trokiti në derën time. Ishte shumë e mërzitur. Po qante’”, thotë Michelle. “Ajo shkoi tek ai sepse nuk ishte e sigurt dhe ishte në gjendje shoku”.
Nëna e Michelle dhe Lavinias nuk është më këtu për të treguar saktësisht se çfarë ndodhi, por Arthur thotë se ajo iu drejtua atij në një moment nevoje.

Michelle arriti gjithashtu të takonte babanë e saj biologjik, Alexin, përmes disa familjarëve të rinj që kishte zbuluar.

“Ishte e qartë që ishte nën ndikimin e drogës”, thotë Michelle.
Ngjashmëria mes tyre ishte e pamohueshme.

“Ai është i imi, unë jam e tij, por nuk ndjeva se është dikush që dua ta kem pjesë të së ardhmes sime”, thotë ajo.
“Thjesht kisha nevojë ta dija”.

Binjaket nuk do ta dinë kurrë nëse nëna e tyre dyshonte se ato kishin baballarë të ndryshëm.

“Duhet ta ketë çmendur kjo gjë”, thotë Lavinia. “Duhet të ketë parë diçka, të ketë ndjerë diçka”.
“Mendoj se në thellësi të mendjes së saj, mami e dinte, por ishte në një mohim të madh”, thotë Michelle.

Si binjake jo-identike, Lavinia dhe Michelle kanë qenë gjithmonë të vetëdijshme për dallimet mes tyre. Të vërtetat e zbuluara nga ADN-ja e tyre i bënë këto dallime të duken edhe më të theksuara në fillim.

Por ato gjithmonë do të ndajnë një lidhje unike.

“Ne jemi mrekulli”, thotë Lavinia. “Do të kemi gjithmonë një afërsi që nuk mund të thyhet”.
“Ajo është motra ime binjake”, pohon Michelle. “Asgjë nuk e ndryshon këtë”.