BE-ja propozon lejimin e deportimit të azilkërkuesve në vendet e treta

Ekzekutivi i Bashkimit Evropian ka propozuar të martën ndryshimin e ligjit të BE-së për të lejuar shtetet anëtare të deportojnë azilkërkuesit e refuzuar në vendet me të cilat ata nuk kanë lidhje, një lëvizje për të cilën grupet e të drejtave thonë se do të minonte të drejtën për azil.

Komisioni Evropian ka thënë se ndryshimet, të cilat do t'i lejojnë vendet të heqin një aplikant për azil nëse ai mund të dërgohet në një vend të tretë që konsiderohet i sigurt nga BE-ja, do të "përshpejtojnë proceset e azilit dhe do të reduktojnë presionin mbi sistemet e azilit", raporton Reuters.

Propozimi do të heqë kërkesën për një lidhje midis azilkërkuesit dhe vendit të tretë të sigurt.

“Koncepti i rishikuar i Vendit të Tretë të Sigurt është një mjet tjetër për të ndihmuar vendet anëtare të përpunojnë kërkesat për azil në mënyrë më efikase, duke respektuar plotësisht vlerat dhe të drejtat themelore të BE-së”, ka thënë komisioneri i BE-së për çështjet e brendshme dhe migracionin, Magnus Brunner.

Ndjenjat kundër imigracionit janë rritur në të gjithë BE-në prej 27-vendesh që kur mbi një milion njerëz, kryesisht refugjatë sirianë, kanë mbërritur përmes Mesdheut në vitin 2015, duke e kapur bllokun të papërgatitur. Në pamundësi për të rënë dakord se si të ndajnë përgjegjësitë, vendet e BE-së janë fokusuar kryesisht në kthimet dhe reduktimin e mbërritjeve.

Ndryshimet parashikojnë gjithashtu që nëse azilkërkuesit apelojnë kërkesat e tyre të refuzuara, ata nuk mund të qëndrojnë automatikisht në territorin e BE-së gjatë procesit të apelimit.

Amnesty International e ka kritikuar ashpër propozimin.

“Të jemi të qartë: ky rishikim vetëm do të dobësonte më tej qasjen në azil në Evropë, do të pakësonte të drejtat e njerëzve dhe do të rriste rrezikun e rikthimit dhe ndalimit arbitrar të përhapur në vendet e treta – veçanërisht duke pasur parasysh paaftësinë gjithnjë e më të dukshme të BE-së për të monitoruar dhe mbështetur të drejtat e njeriut në vendet e saj partnere”, ka thënë Olivia Sundberg Diez, nga Amnesty International.

Propozimi rrjedh nga pakti i BE-së për migracionin që është miratuar në vitin 2023 dhe pritet të hyjë në fuqi në vitin 2026. Megjithatë, ai do të kërkojë miratimin nga Parlamenti Evropian dhe qeveritë anëtare të BE-së.