BE-ja hedh poshtë propozimin për pezullim të marrëveshjes së asociimit me Izraelin

BE-ja mbetet e ndarë në vendosjen e sanksioneve ndaj Izraelit, pavarësisht se disa shtete anëtare e kritikojnë vendin për gjendjen e vështirë të Gazës dhe dhunën kundër palestinezëve nga kolonët izraelitë në Bregun Perëndimor.

Shefja e Politikës së Jashtme e BE-së, Kaja Kallas, ka thënë se propozimet për një pezullim të pjesshëm të marrëveshjes së asociimit BE-Izrael mbetën në tryezë, por se ato kërkojnë që shtetet të ndryshojnë qëndrimet e tyre, për të hyrë në fuqi.

Duke folur pas një takimi midis ministrave të Jashtëm të BE-së të martën, ajo u ka thënë gazetarëve se këtë mundësi nuk e kishin parë gjatë takimit, por se diskutime do të vazhdojnë.

Kallas ka hedhur poshtë kritikat se qasja e bllokut ndaj Izraelit sugjeronte një standard të dyfishtë, një akuzë e ngritur nga disa persona të brendshëm të BE-së, ndërsa ngriti dyshime rreth ndikimit të sanksioneve. 

Veçmas, ajo ka thënë se BE-ja do të shtonte kufizime të gjera ndaj Iranit duke miratuar sanksione të reja ndaj iranianëve të përfshirë në kufizimin e lundrimit të lirë përmes ngushticës së Hormuzit. 

Në takimin e së martës, Irlanda, Spanja dhe Sllovenia i bënë presion Kallasit që të rihapë një pezullim të pjesshëm të marrëveshjes së asociimit të Izraelit me BE-në, e cila u propozua vjeshtën e kaluar, por që nuk siguroi kurrë mbështetjen e shumicës.

Të tre vendet, historikisht mbrojtëse të të drejtave palestineze, i shkruan Kallasit javën e kaluar, duke përshkruar kushtet "e padurueshme" në Gaze me shkelje të vazhdueshme të armëpushimit dhe hyrje të pamjaftueshme të ndihmës humanitare, si dhe dhunë në rritje kundër palestinezëve në Bregun Perëndimor.

Kryeministri i Spanjës, Pedro Sanchez, i cili ka qenë ndër kritikët më të zëshëm evropianë të luftës së Izraelit në Gazë, i ka bërë thirrje BE-së fundjavën e kaluar që të përfundojë marrëveshjen e saj të asociimit me Izraelin.

Mirëpo Gjermania ka thënë se propozimi për pezullimin e marrëveshjes është i papërshtatshëm. Ministri i Jashtëm gjerman, Johann Wadephul, ka deklaruar duhet të bëhet me një dialog kritik dhe konstruktiv me Izraelin.

Marrëveshja e asociimit ka nevojë për miratim unanim nga 27 shtetet anëtare të BE-së që të revokohet, por një pezullim i pjesshëm kërkon vetëm një shumicë prej 15 shtetesh anëtare që përfaqësojnë 65% të popullsisë së BE-së.