Arbëri

VV-ja në Lipjan fton anëtarët e saj të regjistrohen për pjesëmarrje në zgjedhjet e brendshme

Lëvizja Vetëvendosje në Lipjan ka nisur organizimin për zgjedhjet e brendshme me vendim të Këshillit të përgjithshëm të këtij subjekti në nivelin qendror. Por, në Lipjan, ky subjekt i ka ftuar të gjithë anëtarët që fillimisht të regjistrohen në zyrën e LVV-së në Lipjan e mandej tw vazhdojnw me procesin.

“Nisur nga vendimi i Këshillit të Përgjithshëm, organit më të lartë, Lëvizja Vetëvendosje! ka shpallur zgjedhjet e brendshme të përgjithshme. Nga 15 marsi, secili anëtar i Lëvizjes do të ketë të drejtë për të votuar e për t’u kandiduar. LVV-ja është organizata me mbështetjen më të madhe në vend, çka duhet të reflektohet në struktura edhe më të fuqishme, e të cilat do të vijnë si rezultat i zgjedhjeve që do të jenë të drejtpërdrejta, të lira e demokratike”, thuhet në komunikatën e LVV-së në Lipjan.

Sipas këtij subjekti në 30 qendra të Lëvizjes në Kosovë, anëtarët e Lëvizjes do të kenë mundësi që përmes parimit “një anëtar, një votë” të zgjedhin kryesitë e kryetarët e pikave nëpër lagje e fshatra, të propozojnë kandidatët që vlerësojnë më së shumti apo edhe të vetpropozohen.

“Të gjithë anëtarët do të kontaktohen për të marrë pjesë në zgjedhje, kurse ju që mbështetni Lëvizjen, por nuk jeni anëtarësuar ende, vizitoni zyrat e Lëvizjes Vetëvendosje në komunën tuaj dhe anëtarësohuni që të bëheni pjesë e këtij procesi demokratik. Lëvizja fton të gjithë anëtarët që të bashkohen në këtë proces zgjedhor”, thuhet në komunikatë.