Vazhdohet edhe për dy muaj paraburgimi për ish-gardianin serb të akuzuar për krime lufte

Gjykata Themelore në Prishtinë ia ka vazhduar edhe për dy muaj paraburgimin Dragisha Milenkoviqit, i akuzuar për krime lufte kundër popullatës civile, përfshirë keqtrajtim e torturë, gjatë viteve 1998 e 1999 si gardian i Burgut të Prishtinës e Lipjanit.

Lajmin e ka konfirmuar për KOHËN gjyqtari Kujtim Krasniqi. Në seancën e mbajtur më 10 janar, avokati Dejan Vasiq kishte kërkuar që paraburgimi t'i zëvendësohej me arrest shtëpiak, duke thënë se ai dhe familjarët e të pandehurit mund të betoheshin se Milenkoviq nuk do të largohej nga Graçanica. Këtë e kishte kundërshtuar prokurori Atdhe Dema, i cili deklaroi se Milenkoviq akuzohet për një vepër të rëndë penale dhe ka mundësi të ikjes në Serbi.