Kryeministri i Shqipërisë, Edi Rama ka reaguar lidhur me jehonën që ka bërë në disa media të huaja shakaja e tij me presidentin francez, Emmanuel Macron, për gaën e presidentit amerikan Donald Trump, i cili gabimisht ka përsëritur se ka dhënë kontribut për të zgjidhur “konfliktin mes Azerbajxhanit dhe Shqipërisë”, derisa e ka komentuar procesin e paqes mes Armenisë dhe Azerbajxhanit.
Rama ka thënë se është shtrembëruar realiteti dhe se ai moment ka qenë në frymën e miqësisë.
“Është vërtet e jashtëzakonshme se si funksionon media e sotme dhe si e ashtuquajtura ‘viralitet’ mund ta shtrembërojë kaq lehtë realitetin. Një fjali e thënë me humor të mirë, në frymën e miqësisë, papritmas shndërrohet në një kryelajm botëror të një samiti të tërë midis dhjetëra kombeve, ndërsa gjithçka tjetër, substanca e vërtetë, bëhet e parëndësishme. Por po, ishte shumë argëtuese sot të isha me mikun tim të vjetër Ilham Aliyev dhe, në prani të mikut tonë të dashur të përbashkët Emmanuel Macron, t'i referohesha një gabimi të Presidentit Trump se edhe Shqipëria arriti të bënte paqe me Azerbajxhanin, ndërsa vetë Emmanuel punoi pa u lodhur, për një kohë të gjatë, për të sjellë paqe midis Azerbajxhanit dhe Armenisë. Një vërejtje e lehtë, një moment miqësor. Sigurisht, nuk ka problem nëse përhapet, por ta shtrembërosh atë në helm politik është thjesht e padrejtë”, ka shkruar ai në platformën “X”.
Rama tutje e ka cilësuar Trumpin si udhëheqësi që e ka kthyer fjalën “paqe” në fjalorin e Perëndimit pas shumë vitesh.
“Dhe po, në një kohë jashtëzakonisht të shkurtër, ai ka arritur paqe aty ku të tjerët u përpoqën por dështuan dhe ai vazhdon ta ndjekë atë pa u lodhur. Ai shkëmbim nuk ishte gjë tjetër veçse një moment humori të mirë midis njerëzve që, në fakt, janë ndër admiruesit më të mëdhenj të Presidentit Trump”, ka shkruar tutje Rama.