Policia e Kosovës ka kryer bastisje në shtëpinë e serbes A.M. që është në paraburgim në Kroaci nën dyshimin se me të dashurin e saj, pilot kroat të KFOR-it, kanë spiunuar për Serbinë.
Veton Elshani, zëvendësdrejtor i Policisë në veri, ka thënë për KOHËN se bastisja është kryer më 27 gusht në mbrëmje, pas publikimeve në Kroaci për arrestimin e A.M.
Ai ka thënë se kanë pasur informatë se në shtëpinë e saj në Mitrovicë të Veriut mund të ketë armë. “Kemi bastisur këtë shtëpi dhe kemi gjetur një sprej, disa gëzhoja e fishekë”, ka thënë ai të premten.
Serbja e Kosovës, A.M., dyshohet se nga i dashuri i saj merrte informata për lëvizjet e KFOR-it në veri dhe se ato i përcillte te Lista Serbe, apo edhe te akterë të tjerë serbë, përfshirë Vladimir Radivojeviqit, të njohur me nofkën “Mami”, raporton “Index.hr”. “Mami” njihet si lider i “Brigadës së Veriut”, që është shpallur organizatë terroriste në Kosovë. Prokuroria Speciale e Kosovës ka ngritur aktakuzë ndaj Radivojeviqit vitin e kaluar, ndërsa dyshohet se është i lidhur me sulmin terrorist në Banjskë të 24 shtatorit të vitit 2023, gjatë të cilit u vra rreshteri policor Afrim Bunjaku.
Piloti kroat J.I. akuzohet për një formë më të rëndë të krimit, e sipas prokurorisë mund të dënohet deri me 10 vjet burgim. Ai ishte personi që zbuloi informacion sekret, për lëvizjen e trupave të KFOR-it.
A.M. mund të dënohet deri me 5 vjet burgim, për një formë më të butë të spiunazhit, për mbledhjen e informacionit sekret dhe transmetimin e tij.
Çifti ishte takuar në vitin 2016 në Kosovë. Në atë kohë, piloti punonte si pjesë e kontingjentit kroat në KFOR, ndërsa serbja e Kosovës punonte si përkthyese në EULEX.
Marrëdhënia e tyre ka vazhduar për nëntë vjet. A.M. kishte shkuar shpesh në Kroaci.
Piloti dyshohet se u ka thënë hetuesve se partnerja e tij i dërgonte vetëm të dhënat të motit, që ishin të rëndësishme për të si pilot. Ai ka mohuar se shkëmbyen informacione konfidenciale.
E dyshuara, në mbrojtje të veten, pretendoi se punonte për shërbimin sekret gjerman. Ajo tha se punon për Shërbimin Federal të Inteligjencës (BND) që merret me mbledhjen dhe analizën e të dhënave të inteligjencës nga jashtë.
Për rastin të premten, Prokuroria Speciale e Kosovës konfirmoi se ka kërkuar nga Kroacia sigurimin e provave për shtetasen e Kosovës.
“Lidhur me arrestimin e një shtetaseje të Republikës së Kosovës në Kroaci, ju njoftojmë se Prokuroria Speciale është në kontakt me autoritetet përkatëse. Tashmë Prokuroria u ka dërguar kërkesë zyrtare për sigurimin e provave institucioneve të Kroacisë, në përputhje me marrëveshjet për bashkëpunim juridik ndërkombëtar. Prokuroria Speciale do të ndërmarrë të gjitha veprimet e nevojshme ligjore në lidhje me këtë çështje”, thuhet në një përgjigje të zyrës për informim në Prokurorinë Speciale dhënë KOHËS.
Gatishmëri për bashkëpunim me Kroacinë, të enjten ka shprehur edhe zëdhënësi i Qeverisë në detyrë të Kosovës, Përparim Kryeziu. Ai ka thënë se institucionet e Kosovës janë në gatishmëri të plotë që të bashkëpunojnë me institucionet e Kroacisë.
Në një shkrim në Facebook, Kryeziu ka hedhur poshtë pretendimet se e dyshuara serbe nga Mitrovica ka mundur të ketë siguruar informacione të rëndësishme dhe konfidenciale nga Zyra e Kryeministrit.
“Në lidhje me pretendimet se personi me inicialet A.M., serbe nga Mitrovica, e cila është arrestuar nga autoritetet kroate për dyshime për spiunazh për Serbinë, ka pasur lidhje edhe me Zyrën e Kryeministrit të Kosovës, në krye të herës duam ta bëjmë të qartë për publikun se Zyra e Kryeministrit përbëhet nga stafi civil i përhershëm dhe kabinetet e kryeministrit dhe zëvendëskryeministrave të cilat përbëhen nga të emëruar politikë. Më tej, duam të theksojmë se qasja në informacione të rëndësishme dhe konfidenciale të Zyrës së Kryeministrit është strikt e kufizuar. Andaj ne hedhim poshtë çdo pretendim se personi në fjalë mund të ketë siguruar informacione të rëndësishme dhe konfidenciale të Zyrës së Kryeministrit”, ka shkruar ai.
Për rastin e paraburgimit të ish-pjesëtarit të saj, ka reaguar edhe KFOR-i. Në një përgjigje për KOHËN, ky mision ka thënë se siguria e personelit të trupave dhe po ashtu integriteti i informacionit të klasifikuar janë parësore.