Klinika pa sistem ventilimi

Në Klinikën e Pulmologjisë mungon sistemi i klimatizimit dhe ventilimit. Mjekët dhe pacientët detyrohen që të gjejnë rrugë alternative për t’iu përshtatur temperaturave. Drejtori i Klinikës thotë se pasojat për shëndetin e pacientëve mund të jenë të theksueshme, teksa shton që nga SHSKUK-ja kanë munguar veprimet në kërkesat e adresuara për zgjidhjen e problemit. E në këtë shërbim, me gjithë pyetjet e adresuara nga KOHA rreth një javë më parë, nuk u përgjigjën për zgjidhjet e planifikuara

Në Klinikën ku trajtohen pacientët që kanë probleme në rrugët e frymëmarrjes, nuk ka sistem të ajrosjes e të ventilimit.

Në mungesë të tyre, pacientët dhe pjesëtarët e stafit të Klinikës së Pulmologjisë në Qendrën Klinike Universitare thonë se detyrohen që të përdorin rrugë alternative për t’iu përshtatur kushteve klimatike.

Hapja e dritareve, sipas pacientëve, është zgjidhja që ata bëjnë për të ajrosur hapësirat gjatë mbretërimit të temperaturave të larta.

“Temperatura përafërsisht është e njëjtë, konstante. Nuk është as dielli i madh e as vranësirat e mëdha. Në mëngjes i hapim dritaret për pak, veç sa për ajrosje, kurse menjëherë i mbyllim”, ka thënë pacienti Rrahim Bajgora.

Por hapja e dritareve përcillet edhe me disa pasoja, si mundësia e futjes në dhoma e insekteve të ndryshme.

Musa Hoxha, pulmolog dhe drejtor i Klinikës, ka thënë se mospajisja me sistem të ajrosjes ndikon në dehidratimin e pacientëve.

“Për muajt e verës dhe temperaturat e larta, ndikon po ashtu edhe në dehidratim të pacientëve dhe në gjendjen e tyre të përgjithshme, për shkak të gjendjes së tyre klinike. Por në anën tjetër, në klinikën tonë, përveç klimatizimit, ka nevojë edhe për ventilim, kur dihet se infeksionet e ndryshme janë prezente gjithmonë në klinikat, në përgjithësi në QKUK. Por sidomos në disa klinika, siç është Klinika e Pulmologjisë, që e kemi edhe repartin e sëmundjeve specifike dhe tuberkulozin”, ka thënë Hoxha.

Ai thotë se në Shërbimin Spitalor Klinik e Universitar ka adresuar kërkesa për investime në drejtim të sigurimit të ajrimit, porse me gjithë premtimet kanë munguar veprimet.

Lidhur me këtë problem në Klinikën e Pulmologjisë KOHA ka adresuar pyetje në SHSKUK, porse përgjigjet nuk i ka marrë as pas gati një jave.