Deputeti shqiptar në Kuvendin e Serbisë, Shaip Kamberi, ka thënë se banka HalkBank në Serbi, po i refuzon donacionet që vijnë nga Kosova për Këshillin Kombëtar Shqiptar pa asnjë arsyetim.
Ai ka thënë se kjo është përpjekje për të izoluar institucionalisht shqiptarët e Luginës së Preshevës dhe për të penguar lidhjet e tyre me Kosovën.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoKamberi në një reagim në Facebook, ka thënë se për këto bllokime financiare nga kjo bankë janë informuar edhe mekanizmat ndërkombëtarë dhe sipas tij Evropa po hesht kur po shkelen të drejtat e pakicave të cilat janë themel i arkitekturës së BE-së.
Kamberi ka thënë se për këtë po hesht edhe ambasada turke ndonëse është institucion financiar i lidhur me të.
“Heshtja përballë kësaj padrejtësie nuk është neutralitet; ajo shndërrohet në bashkëfajësi dhe i jep hapësirë vazhdimit të diskriminimit. Të drejtat e pakicave janë themeli i arkitekturës së Bashkimit Evropian, ndërsa Evropa hesht kur shkelen parimet e saj themelore. Pse heshtin BE, OSBE, KE dhe ambasadat perëndimore? Dhe, mbi të gjitha, pse hesht ambasada turke duke lejuar që një institucion financiar i lidhur me të bëhet pjesë e një mekanizmi diskriminues ndaj pakicës shqiptare?”, ka shkruar mes tjerash Kamberi.
Kamberi ka thënë gjithashtu se ndër kategoritë më të prekura janë nxënësit, studentët, mediat, shoqëria civile, bujqit, si dhe organizatat që punojnë me fëmijët me nevoja të veçanta.
Rexhepi: Kemi dorëzuar fakte që Serbia po bllokon donacionet që vijnë nga Kosova
Kryetari i Këshillit Kombëtar Shqiptar, Enkel Rexhepi, ka thënë se kanë njoftuar të gjithë faktorët ndërkombëtarë për bllokimin e transfereve dhe donacioneve që vijnë nga Qeveria e Kosovës për shqiptarët e Luginës së Preshevës në Serbi.
Rexhepi ka thënë se ka dorëzuar edhe fakte që kjo po ndodhë përmes bankës nga Qeveria e Serbisë dhe ministrit Demo Berisha.
“Ky nuk është vetëm bllokim fondesh. Ky është bllokim i zhvillimit, i arsimit dhe i mbështetjes për shqiptarët në Luginën e Preshevës dhe Sanxhakut. Sipas të gjitha fakteve dhe dokumentimit që kemi dorëzuar, kjo po ndodh përmes bankës nga Qeveria e Serbisë dhe ministri Demo Berisha ështe shkelje e çdo norme. Ky është diskriminim i hapur. Dhe si i tillë duhet të trajtohet nga të gjithë, pa përjashtim”, ka thënë në reagimin e tij në Facebook, Rexhepi.
Rexhepi në reagimin e tij ka shkruar po ashtu se bllokimi i këtyre fondeve prek drejtpërdrejt “3650 nxënës, 97 fëmijë pa prind dhe 957 bujq, mbi 756 studentë, 139 organizata joqeveritare dhe mijëra qytetarë që varen nga këto programe”.