-
Nga:
Majlinda Ibrahimi
- 29 janar 2025 23:05
- Shpërndaje në:
Kandidati për kryeministër i koalicionit rreth AAK-së, Ramush Haradinaj, ka paralajmëruar të mërkurën për një rrezik që i kanoset Kosovës. Ai, në tubimin elektoral të mbajtur në Shtime, ka thënë se ekziston rreziku që Kosova të përjashtohet edhe më tej nga fondet e tjera ndërkombëtare dhe që faktori ndërkombëtar të marrë vendime për Kosovën, pa Kosovën. E kandidati për deputet i këtij koalicioni, Fatmir Limaj, ka akuzuar qeverisjen katërvjeçare të Lëvizjes Vetëvendosje se i ka neglizhuar veteranët e Ushtrisë Çlirimtare
Teksa ka numëruar premtimin për siguri energjetike, kandidati për kryeministër i koalicionit “Për Kosovën Fituese”, Ramush Haradinaj, ka paralajmëruar të mërkurën për një rrezik që i kanoset Kosovës.
Në tubimin elektoral të koalicionit mes Aleancës për Ardhmërinë e Kosovës, Nismës Socialdemokrate, Forumit të Intelektualëve, Konservatorëve dhe Ideal në Lipjan, Haradinaj ka theksuar se faktori ndërkombëtar mund ta ndëshkojnë Kosovën.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Ekziston mundësia reale, nëse nuk e kryen punën mirë me këtë votë, do të na përjashtojnë edhe më shumë, se bota ka ndryshuar shumë, sidomos nga zgjedhjet e presidentit Trump në Amerikë. Dinamikat janë krejt të reja, zhvillimet janë krejt të reja, nuk ka kohë për tolerancë për budallaki të kurrkujt”, ka thënë Haradinaj. “Pra, ekziston mundësia me u marrë vendime për Kosovën, pa Kosovën”, ka shtuar ai.
E kryetari i Nismës Socialdemokrate, Fatmir Limaj, para qytetarëve në Lipjan ka akuzuar qeverisjen katërvjeçare të Lëvizjes Vetëvendosje se i ka neglizhuar veteranët e Ushtrisë Çlirimtare (UÇK).
“Ju kanë ofenduar, ju kanë fyer, kanë bërë marrëveshje duke ua ndaluan atë që ju takon financiarisht. Tani vijnë këtu e bëhen kinse flasin për ju. Nuk ka adresë të zemrës e shpirtit që i mbron këto kategori, edhe të familjes së dëshmorëve, edhe të invalidëve, edhe të veteranëve sesa Kosova fituese me numër 137”, ka thënë ai.
Krahas në Lipjan, koalicioni rreth AAK-së ka mbajtur të mërkurën tubim edhe në Shtime, me ç’rast përfaqësues të tij kanë thënë se kjo komunë është e përfshirë në kuadrin e projekteve kapitale që parashihen me program të realizohen gjatë katër vjetëve të qeverisjes nga ky koalicion.
Haradinaj ka premtuar përmirësimin e infrastrukturës rrugore si dhe jetësimin e autostradës së Dukagjinit.
Kandidati për kryeministër i koalicionit rreth AAK-së është zotuar njashtu edhe për ndërtimin e unazës së jashtme për Prishtinën, të aksit ndërlidhës të autostradave në Duhël si dhe ndërtimin e rrugës Prizren-Tetovë.
E nëpërmjet një postimi në rrjetin social Facebook, Haradinaj e ka bërë zotimin se me të si kryeministër do të finalizohen shtatë projekte tashmë të filluara – përfshirë autostradën e Gjilanit dhe atë në Pejë.
Haradinaj gjithashtu është zotuar që ta përfundojë ndërtimin e rrugës Klinë-Gjakovë, si dhe atë Prishtinë-Mitrovicë.
Premtim ka dhënë edhe për finalizimin e rrugëve Deçan-Plavë e Prishtinë-Podujevë.
Programi qeverisës i koalicionit të emërtuar “Për Kosovën fituese” është i ngritur mbi katër shtylla: anëtarësimi direkt i Kosovës në Aleancën Veriatlantike të NATO-s; zhvillimi ekonomik; përmbyllja e dialogut me Serbinë me njohje reciproke dhe integrim në BE; si dhe ndalja e braktisjes së Kosovës nga qytetarët.
Programi qeverisës i koalicionit e përfshin edhe dyfishimin e pagave për punëtorët e sektorit publik dhe rritjen e pagës minimale në nivel prej mbi 500 eurosh. Po ashtu, ky koalicion ka premtuar formimin e ministrisë për familje.
Në programin qeverisës të koalicionit përfshihet edhe mbështetja për gratë dhe shtesa për fëmijët e porsalindur. 1.500 euro është shuma që ky koalicion është zotuar se do ta ndajë për familjet që presin fëmijën e parë, 2.500 për të dytin dhe 3.500 për fëmijën e tretë.
Koalicioni mes AAK-së, Nismës, Intelektualëve, Konservatorëve dhe Ideal është zotuar edhe për ngritjen e cilësisë në arsim. Në këtë funksion është premtuar rritja e buxhetit për arsim në nivelin e 6 për qind të GDP-së. Është bërë zotimi edhe për përmirësimin e infrastrukturës arsimore si dhe rritja e pagës për punëtorët e arsimit në të gjitha nivelet, për 50 për qind.
Në listën e prioriteteve të programit të koalicionit është edhe rritja ekonomike vjetore deri në 7 për qind dhe 1 miliard euro për bizneset e reja si dhe ato prodhuese-eksportuese, përmbyllja e projekteve rrugore që kanë mbetur në gjysmë dhe ndërtimi i autostradës së Dukagjinit. Në programin e këtij koalicioni parashihet gjithashtu përfshirja e mërgatës në vendimmarrje, si dhe pensione pa shkëputje nga puna për veteranët dhe invalidët e Ushtrisë Çlirimtare të Kosovës.