Deputeti britanik, Nigel Farage, ka polemizuar me kryeministrin e Shqipërisë, Edi Rama, pasi ky u shpreh ditë më parë se “Britania e Madhe ka rënë në një vend shumë të errët”.
Farage ka shkruar të dielën në rrjetin social X që në Britaninë e Madhe janë 53.000 qytetarë shqiptarë, e 1.099 prej tyre tha se gjenden në burgje. Sipas deputetit, kjo është në raport 1 me 48, derisa shtoi se do të bëjë kërkesë që të kthehen në Shqipëri.
Dear @EdiRamaal.
There are 53,000 Albanian citizens in the UK & 1,099 are in our prisons. That’s actually 1 in 48.
I will be asking the Home Secretary to organise for all of these prisoners to be sent back to you.
Thank you for your cooperation. https://t.co/fj4vzgIo1y— Nigel Farage MP (@Nigel_Farage) June 29, 2025
“I dashur Edi Rama. Në Mbretërinë e Bashkuar janë 53,000 qytetarë shqiptarë dhe 1,099 prej tyre janë në burgjet tona. Në fakt, kjo është 1 në 48. Do t'i kërkoj Sekretarit të Brendshëm të organizojë që të gjithë këta të burgosur t'ju kthehen. Faleminderit për bashkëpunimin tuaj”, ka shkruar ai.
Kryeministri i Shqipërisë tha se prej procesit të BREX-it, Britania po kërkon vende për t'i hequr imigrantët.
“Është një nga ato gjërat që 10 vjet më parë thjesht nuk do të ishte e imagjinueshme... që Britania të kërkojë vende për t’i larguar imigrantët”, ka thënë ai nga Tirana. “Fakti se sot jo vetëm që është e imagjinueshme, por po ndodh, nuk është për shkak se Keir Starmer ose Rishi Sunak (ish-kryeministri) po bëjnë diçka të jashtëzakonshme; është sepse shteti gjendet në një vend shumë të errët”, është shprehur Rama në një intervistë për The Guardian.
Ai po ashtu i kërkoi deputetit Farage që të largojë hipokrizinë anash të flasë me fakte e shifra reale, derisa e ftoi që të vizitojë Shqipërinë “për të marrë diell të vërtetë, mikpritje të vërtetë dhe më shumë fakte reale”.
