Mbrëmje e vështirë për Kosovën, mposhtet nga Austria në Vjenë

Rangnick thotë se ndaj Kosovës është vështirë të luhet

Përzgjedhësi i Austrisë, Ralf Rangnick, ka vlerësuar Kosovën. Por ai ka theksuar se ekipi tij fitoi me meritë ndaj “dardanëve”.

Austria e mposhti Kosovën të dielën në Vjenë me rezultat 3:1, në kuadër të Grupit B3 të Ligës së 
Kombeve. Rangnick thotë se Austria e kishte ndeshjen në kontroll gjatë gjithë kohës. 

“E dinim se do të luajmë ndaj një ekipi të fortë dhe me përkrahje të madhe nga tribunat. Ishte një nga paraqitet më të mira energjike që kemi pasur në vitet e fundit”, ka thënë Rangnick.

Ai ka theksuar se Kosova “është skuadër e vështirë për të luajtur kundër tyre”.

“E kam parë ndeshjen ndaj Irlandës. E kanë merituar fitoren. Do të duhej të shënonin më shumë gola”, ka theksuar tekniku i austriakëve.

Ai ka theksuar se Austria synon vendin e parë në Grupin B3.

“Synimi është vendi i parë, por e rëndësishme është se si do të luajmë. Kjo për është e rëndësishme”, ka thënë Rangnick.

Vojvoda: Është humbje e gjithë ekipit

Mbrojtësi Mërgim Vojvoda, ka thënë se “është humbje e ekipit” jo vetëm e një lojtari.

Kosova humbi 3:1 nga Austria të dielën në Vjenë.

“E kemi ditur se janë të fortë në kundërsulme. U kemi lënë hapësirë lojtarëve të tyre. Por duhet të harrojmë këtë humbje dhe të shkojmë për fitore në Hungari ndaj Izraelit. Presim vendin e parë në këtë grup. Albian Hajdari është lojtar i rëndësishëm, si gjithë të tjerët. Por secili lojtar duhet të tregojë se është gati. Është humbje e ekipit, jo faji një lojtari apo tjetrit. Është humbje e gjithë ekipit”, ka thënë Vojvoda.

Foda tregon se ku dështoi Kosova

Selektori i Kosovës, Franco Foda, është shprehur i dëshpëruar me humbjen nga Austria. 
Kosova të dielën u mposht në Vjenë 3:1 nga Austria, në kuadër të Grupit B3 të Ligës së Kombeve. 

Foda në konferencën e mbajtur për shtyp pas ndeshjes deklaroi se skuadra duhet të përmirësohet në mbrojtje për ndeshjet e ardhshme. 

“Nuk ishim në lojën tonë. Fillimi ka qenë i mirë për ne. Është dashur që në fillim të udhëheqim 1:0. Nuk kemi pasur mbrojtjen e mirë as pas 2:0. Kemi pasur raste por që nuk i kemi shfrytëzuar. Skuadra gjatë gjithë kohës nuk ka hequr dorë.  Austria ka bërë punë të mirë. Kur kemi humbur një apo dy topa, Austria ka shfrytëzuar rastet. Shpresa kemi gjithmonë. Edhe sot kemi pasur shpresa që do të fitojmë. Është më rëndësi organizimi i mbrojtjes. Në këtë drejtim duhet të punojmë. Duhet të përmirësohemi”, u shpreh Foda.

Zhegrova: Nuk ishte nata jonë

Edon Zhegrova ka thënë se “nuk ishte nata” e Kosovës në Vjenë.

Kosova e humbi 3:1 ndeshjen ndaj Austrisë të dielën mbrëma në Grupin B3 të Ligës së Kombeve.

“Mendoj se sonte nuk ishte nata jonë. Gabuam sonte, por ka përfunduar gjithçka. Do të shohim gabimet ku i kemi pasur për të parë për ndeshjen e radhës”, ka thënë Zhegrova, i cili në fushë u inkuadrua në pjesën e dytë. “Lojën e fundit kam luajtur nga minuta e parë. Jam në gjendje të mirë fizike, kisha një shqetësim, por asgjë nuk ishte serioze. Austria ishte më e mirë se ne sot”.

Zhegrova tha se goli i shënuar nga pika e bardhë nuk kishte rëndësi.

“Nuk është me rëndësi goli, e rëndësishme ishte që dëshironim të shënonim fitore. Nuk kam çka të them më shumë”, ka thënë Zhegrova.

Asllani shfaqet i dëshpëruar dhe i shkurtër në përgjigje

Sulmuesi i Kosovës, Fisnik Asllani ka qenë shumë i shkurtër në përgjigjet pas ndeshjes.

I pyetur nëse ishte mirë fizikisht të paraqitej nga fillimi në ndeshjen kundër Austrisë, Asllani tha se “Unë jam fit”. “Unë jam në gjendje për të luajtur”, ka thënë Asllani.

Ai është përgjigjur vetëm me “Po” nëse ishte pajtuar me vendimin e trajnerit për ta aktivizuar si rezervist.

I gjatë nuk ishte edhe në përgjigjen sa i përket gjuajtjes së penalltisë.

Asllani është parë duke insistuar që ai të ishte gjuajtësi i penalltisë. Por në fund, penalltinë e gjuajti Zhegrova, i cili ishte i saktë.

“Ka dashur të shutoj dhe ka dhënë gol”, është shprehur Asllani.

Sulmuesi i Hoffenheimit ka pranuar se Austria ishte në fushë më e mirë.

“Besoj se Austria ka qenë ekip më i mirë. Ditë të tilla ka në futboll dhe duhet të mundohemi të fitojmë ndaj Izraelit. Austria ka qenë kundërshtar më i fortë se Irlanda. Shihej kualiteti i tyre në fushë, ne dhamë maksimumin, por tash duhet të përgatitemi për ndeshjen ndaj Izraelit”, ka thënë Asllani.
 

Muriqi merr përgjegjësinë për rastin e humbur dhe disfatën

Kapiteni i Kosovës, Vedat Muriqi, ka marrë përgjegjësi për rastin e humbur në minutën e gjashtë të ndeshjes ndaj Austrisë. Muriqi pranon se ndeshja mund të kishte rrjedhë tjetër sikur të realizonte gol. I vetëm përballë portierit austriak, Muriqi gjuajti lart mbi portë. Kosova pësoi 3:1.   

“E kemi ditur se do të jetë kundërshtar i fortë. Kishim përkrahjen e 10-15 mijë shqiptarëve. Kisha rastin dhe po të shënoja gol, do të bisedonim ndryshe. E marr përgjegjësinë për rastin .Si kapiten më vjen keq”, ka thënë Muriqi pas ndeshjes. 

Ai ka thënë se rrugëtimi i Kosovës në Grupin B3 të Ligës së Kombeve do të varet nga ndeshja kundër Izraelit në Debreçen të Hungarisë të enjten e ardhshme.

“E kemi një lojë që mund të jetë përcaktues për rrugën tonë dhe ku do të përfundojmë në grup. Kjo lojë ka përfunduar, duhet të përgatitemi për ndeshjen e radhës. Kemi pak kohë për rigjenerim dhe na pret një kundërshtar që luan futboll të mirë”, është shprehur Muriqi. 

Ai ka theksuar se Kosova e pranoi golin e dytë në momentin më të keq. 

“Po ta mbyllnim ndeshjen në disavantazh 1:0, do të ishte më ndryshe. Por ramë, gjë që nuk është dashur të ndodhë. E marrë përgjegjësinë si kapiten për rastin dhe ndeshjen. Besoj në bashkëlojtarët dhe ekipin. Ndeshja ndaj Izraelit në Debreçen do të jetë përcaktues. Por shpresoj në fitore në Hungari”, ka thënë Muriqi.

Rangnick: E kishim ndeshjen nën kontroll

Selektori i Austrisë, Ralf Rangnick, është ndarë i kënaqur me fitoren ndaj Kosovës. 

Kosova të dielën u mposht në Vjenë 3:1 nga Austria, në kuadër të Grupit B3 të Ligës së Kombeve. 
Rangnick thotë se Austria e kishte ndeshjen në kontroll gjatë gjithë kohës. 

“Të gjithë në stadium e panë energjinë tonë pozitive sot; ishte vërtet mirë. Nuk ka nevojë të veçojmë askënd. E patëm ndeshjen nën kontroll pothuajse gjatë gjithë kohës. Edhe në stërvitje ka një energji të mirë tani, le ta ruajmë këtë ritëm”, u shpreh 68-vjeçari Rangnick.

Ndërkohë mbrojtësi David Affengruber që e realizoi golin e parë në ndeshje u shpreh i lumtur me fitoren ndaj Kosovës. 

“Ishte një paraqitje shumë e mirë. Në fakt, donim ta mbanim portën të paprekur; fatkeqësisht, shkaktova një penallti që, sipas mendimit tim, ishte disi e 'lehtë'. Megjithatë, ishte një paraqitje e mirë. Të tjerët do të duhet të gjykojnë nëse kjo më jep mundësinë për paraqitje të tjera, por unë dhashë gjithçka nga vetja dhe jam i lumtur për fitoren”, ka thënë Affengruber.

Katër ndryshime tek Austria

Pas fitores 3:1 ndaj Izraelit në ndeshjen e parë në Grupin B3 të Ligës së Kombeve, Austria ndaj Kosovës do të paraqitet me katër ndryshime në formacion. 

Kështu ka vendosur përzgjedhësi Ralf Rangnick. 

Christian Zawieschitzky do të jetë në portë dhe do të debutojë ndaj Kosovës. 
David Affengruber do të luajë titullar në vend të Phillip Lienhart në mbrojtje. Në mesfushë titullar është Paul Wanner, ndërsa në sulm në vend të të lënduarit Michael Gregoritsch, titullar do të jetë Junior Adamu.

Formacioni i Austrisë: 
Zawieschitzky, Veratschnig, Affengruber, Danso, Wober, Schlager, Seiwald, Wimmer, Wanner, Schmid, Adamu

Kosova publikon formacionin, Zhegrova në stol

Selektori i Kosovës, Franco Foda, ka publikuar formacionin startues për ndeshjen ndaj Austrisë. 
Kosova nga ora 18:00 luan në Vjenë ndaj Austrisë, në ndeshjen që i takon Grupit B3 të Ligës së Kombeve.

Nga minuta e parë do të luajë mbrojtësi Ron Raçi, që e zëvendëson Albian Hajdarin e lënduar.
Ndërkohë në vend të Edon Zhegrovës në krahun e djathtë do të startojë Ermal Krasniqi. Zhegrova mbetet në stol.

Në portë do të jetë Arijanet Muriq. Mbrojtja përbëhet me Lumbardh Dellovën, Ilir Krasniqin, Raçin, Dion Gallapenin dhe Mërgim Vojvodën.

Në mesfushë janë Leon Avdullahu dhe Veldin Hoxha.

Sulmit i prijnë Vedat Muriqi, Ermal Krasniqi dhe Baton Zabërgja.