Xherdan Shaqiri ka shkëlqyer kur më së shumti duhej – në fazën finale të kampionatit. Dhe falë kontributit të tij të madh, Baseli të dielën e festoi titullin e kampionit të Zvicrës në futboll.
Te Baseli janë plot lavde për kapitenin e kësaj skuadre. Por kontributin e madh të Shaqirit, sidomos në fazën finale të kampionatit, e çmojnë edhe në ekipet rivale të Baselit.
“Ajo që ka arritur Shaqiri është e jashtëzakonshme”, ka thënë trajneri i Servettes, Thomas Haberli.
“Në javët e fundit ai ka vendosur thuajse secilën ndeshje”, ka shtuar Haberli.
33-vjeçari Shaqiri i realizoi tre gola të shtunën në fitoren 5:2 ndaj Luganos. Një ditë më pas Sevette u ndal në barazim nga Young Boysi dhe kështu Baseli e siguroi titullin që e ka pritur për tetë vjet.
Në shtatë fitoret e fundit të Baselit, Shaqiri ka kontribuuar me nëntë gola e tetë asistime. Është bilanc i jashtëzakonshëm, shkruan “Blick” të hënën.
“Urime për Baselin, urime për Shaqirin. Ua heqim kapelën”, ka vazhduar Haberli.
Edhe trajneri i Young Boysit, Giorgio Contini, ishte plot lavde për Shaqirin. Ai e njeh shumë mirë Xherdanin nga koha kur ishte ndihmës i selektorit Murat Yakin.
“Jam i lumtur për çdo gol të Shaqirit dhe çdo lëvizje të tij. Ai nuk është vetëm djalosh i këndshëm dhe i shkëlqyer, por njëri prej futbollistëve më të mirë që kemi në Zvicër”, ka theksuar Contini. “Ai luajti rol të madh në atë që Baseli arriti në fund”.
Edhe pronari i Baselit, David Degen, foli në superlativ për Shaqirin. Ai ka treguar se i ka thënë Shaqirit se do t’i ndërtojë një “monument”. Degen ka theksuar se Shaqiri e kishte më së vështiri.
“Ai zgjodhi rrugën më të vështirë. Ai ka mundur të lëvizë për në Arabi Saudite. Por u kthye në Basel dhe e udhëhoqi klubin drejt titullit të parë në tetë vjetët e fundit. E hoqi presionin nga lojtarët e tjerë, që u mundësoi atyre të rriten nën ndikimin e tij. Kjo është një skenë vërtetë e mahnitshme”, ka thënë Degen.
Shaqiri i ka 18 gola dhe 20 asistime në 30 paraqitje kampionale. Vetëm Mohamed Salah i Liverpoolit, Harry Kane i Bayernit dhe Viktor Gyokeres i Sporting Lisbonës kanë kontribut më të madh se Shaqiri në gola dhe asistime në gjithë futbollin evropian.
“Për këtë jam kthyer. Erdha me ambicie, me synime. Kur u largova nga Baseli, klubi gjithnjë ka luajtur për tituj”, ka thënë Shaqiri gjatë festës së zjarrtë të së dielës mbrëma. Synimi i tij i madh ishte titulli i kampionit.
“Nuk kam menduar se do të funksionojë në vitin e parë, por kjo është edhe më mirë. Kemi shansin që të fitojmë dy trofetë. Shanset janë shumë të mira”.
Në finale të Kupës, Baseli takohet me Bielin e kategorisë së tretë. Në kampionat, Baseli i ka edhe tri ndeshje. Shaqirit i duhen gola e asistime të tjera për të thyer rekordin e legjendës Stephane Chapuisat për kontribut në gola gjatë një edicioni. Kontributi i tij në edicionin 2003/04 ishte në 43 gola. 24 prej tyre i kishte realizuar vetë. Aktualisht Shaqiri ka kontribut në 38 gola.
Mediat zvicerane vlerësojnë meritat e Shaqirit për titullin e Baselit
Mediat zvicerane kanë shkruar shumë në fundjavë dhe të hënën për titullin e Baselit dhe për kontributin e madh të Xherdan Shaqirit në këtë sukses.
“Personi që e bëri të mundur këtë sukses ishte Xherdan Shaqiri”, ka shkruar NZZ.
“Sa herë të përmendet titulli i 21-të i Baselit, mendja do të shkojë te Shaqiri”, ka shkruar Basler Zeitung.
CH-Media po ashtu ka përmendur formën e jashtëzakonshme të Shaqirit, njëjtë si “Blick”, “20 Minuten”, “Bluewin.ch” e mediat e tjera.
