Feronikeli 74 e Malisheva kërkojnë pikët e vlefshme

Deri në përfundim të edicionit në Superligën e Kosovës në futboll kanë mbetur edhe gjashtë xhiro.

Pra në lojë janë edhe plot 18 pikë dhe shumëçka mund të ndryshojë në këta gjashtë xhiro.

Për Feronikelin 74 çdo pikë e fituar deri në fund të kampanjës do të jetë e rëndësishme për misionin e vetëm – mbetjen në elitë.

Malisheva ndryshoi objektivin përgjatë rrugës. Tani synon një vend që dërgon në garat evropiane.

Feronikeli 74 është në pozitën e tetë, përkatësisht të barazhit, me 31 pikë, tri më pak se Gjilani që është në vendin e shtatë e që siguron mbetjen në Superligë.

Malisheva është e katërta dhe ka 52 pikë, gjashtë më pak se Llapi i vendit të tretë. Vendi i tretë siguron daljen në Evropë.

Feronikeli 74 dhe Malisheva të shtunën prej orës 15:00 do të ballafaqohen në duelin e xhiros së 31-të të Superligës.

Kjo ndeshje luhet në stadiumin “Rexhep Rexhepi” në Drenas.

Mesfushori me tipare sulmuese i skuadrës nga Drenasi, Ibrahim Cërvadiku, beson në fitore ndaj Malishevës.

“Besojmë shumë se do t’i ikim vendit të barazhit. Trajneri është duke e bërë një punë shumë të mirë dhe ekipi është shumë i motivuar për ta bërë një gjë të tillë. Feronikeli është një skuadër që i kalon vështirësitë dhe jemi të motivuar për këtë qëllim si dhe çdo synim tjetër që e kanë skuadrat e mëdha”, ka thënë 21-vjeçari që në edicionin aktual ka tri gola të shënuar.

Njëri prej individëve cilësorë te skuadra e Malishevës është mesfushori Etnik Brruti.

Brruti është vlerësuar pozitivisht nga njohës të futbollit për paraqitjet e deritashme.

Mesfushori i qendrës ka thënë se te Malisheva po punohet shumë për arritjen e objektivave.

“Po punojmë shumë i gjithë ekipi dhe stafi, që ta vazhdojmë formën e mirë. Ka ende shumë lojë dhe besojmë deri në fund. Shpresojmë që të luajmë në garat evropiane”, ka thënë 20-vjeçari.

Ai ka shtuar se udhëtimi në Drenas do të jetë i vështirë.

“Ndeshja me Feronikelin normalisht se do të jetë shumë e vështirë. Por, mendoj se jemi përgatitur shumë mirë gjatë javës për t’i fituar tri pikë”, ka theksuar Brruti.

Malisheva del në Evropë edhe nga vendi i katërt, nëse Ballkani fiton Kupën. Por kjo nuk është garanci.

Nga tri ndeshjet e ndërsjella të edicionit aktual, Malisheva ka dy fitore, ndërsa një ndeshje është mbyllur baras.

Të shtunën do të zhvillohet edhe ndeshja Fushë Kosova – Liria, ndërsa në program për t’u luajtur të dielën janë derbi Prishtina – Llapi, pastaj Gjilani – Ballkani, Dukagjini - Drita.

Superliga – 31

E shtunë (15:00)

Fushë Kosova – Liria

Feronikeli 74 – Malisheva

E diel (15:00)

Prishtina – Llapi

Gjilani – Ballkani

Dukagjini – Drita