“Ballkan trafik” urë midis kulturave

Disa ditë para se të nisë festivali “Balkan Trafik”, Zyra Diplomatike e Belgjikës në Kosovë bëri bashkë gazetarë e artistë.

Julien Sassel, shef i Zyrës Diplomatike të Belgjikës, ka thënë se ky organizim u bë me qëllimin e tejkalimit të idesë se ambasadat kanë të bëjnë vetëm me politikë dhe të krijojnë ura lidhëse midis kulturave.“Balkan Trafik” sivjet prej 27 deri më 30 prill mban edicionin i 17-të në Bruksel por me ngjarje shtrihet edhe në vende të ndryshme përfshirë edhe Kosovën.

“Nëse flasim në përgjithësi është ky koncepti i diplomacisë publike dhe është e vërtetë se fatkeqësisht për shumë arsye, nganjëherë për arsyet e duhura nganjëherë për ato të gabuara, ambasadat lidhen me gjëra më pak të këndshme si politika, investimet ekonomike ose vizat. Unë besoj se ambasadat e kanë edhe një rol të rëndësishëm, atë që t’i bëjnë njerëzit bashkë. Dhe kjo bëhet më së miri nëpërmjet kulturës. Jo vetëm duke e promovuar dhe duke e kuptuar kulturën e njëri-tjetrit por edhe duke e parë atë nga afër”, deklaroi Sassel.

Mbrëmja erdhi si pjesë e festivalit “Balkan Trafik” organizuar prej Nicolas Wieërs. Në kuadër të disa aktiviteteve Wieërs sjell edhe një udhëtim nëpër Prishtinë me gazetarë belg në mënyrë që të përjetohen Prishtina dhe kultura e saj nga afër.

“Jam duke e organizuar një ‘press trip’ me 12 gazetarë nga Belgjika dhe mediat evropiane. Do të vizitojmë dhe takojmë artistë dhe aktivistë kosovarë. Aktivistë për mbrojtjen e ambientin, barazi gjinore të cilët po i ftojmë në festivalin tonë. Qëllimi i ‘press trip’ është që këta [pjesëmarrës ta tejkalojnë perceptimin që e kanë për Kosovën, dhe t’i sjellim ata këtu do të thotë se do të shohim për nga afër jetën dinamike në Prishtinë”.

“Në kuadër të festivalit ‘Balkan Traffic’ do të vijnë artistë të njohur si Dren Abazi dhe Zig Zag Orkestra. Po ashtu Fitore Berisha, një piktore e muraliste njëherësh edhe aktiviste për barazi gjinore e feministë, gjë që është shumë e rëndësishme sepse ka shumë njerëz në Bruksel që mendojnë si ajo. Kjo është një mënyrë që e kam gjetur për të treguar se të gjithë jemi të njëjtë. Dhe ky festival po i bën bashkë komunitetin kosovar dhe atë belg”, përfundoi Wieërs.

Mbrëmja e së hënës u përcoll edhe me një performancë të shkurtër nga Besnik dhe Zymrije Grajçevci të ansamblit “Shota”. Është viti i dytë që po marrin pjesë në këtë festival, i cili sipas tyre, e bën bashkëpunimin e afërt me ta dhe artistët e tjerë.

“Është një përvojë jashtëzakonisht e mirë, ku në vazhdimësi ‘Balkan Trafic Festival’ me bashkëpunëtorët e vet, e mban bashkëpunimin shumë afër e ngrohtë dhe vazhdimisht të kërkon, të tërheqë ë e të ofron diçka për bashkëpunim”.

Në hapësirat e “Termokis”, Zenel Laçi ka sjellë një solo performancë në të cilën ai e rrëfen rrugëtimin e tij drejt mërgimit. Për tash e dy gjenerata ai dhe familja e tij jetojnë në Bruksel.

“Është historia ime, një djalë i emigrantit të viteve të 70-ta, në një familje patriarkale. Baba ëndërronte të shkojë në Amerikë. Na kufizoi neve 5 fëmijëve vetëm të punojmë me mbledh para në mënyrë që të shkojë dhe ta realizojë ëndrrën e tij. Fati i tij e gjeti një lokal aty ky përgatiteshin pomfrit, një specialitet i Brukselit, ne nuk kishim ide se si përpunohen patatet dhe mua më mori nga shkolla dhe më futi në punë si 14-vjeçar”.

Në kuadër të festivalit, në kryeqytet do të vijnë edhe murale nga Fitore Berisha dhe artistë të tjerë nga Belgjika si dhe ngjarje të tjera kulturore.