Pjesë të kryeveprave botërore janë zbërthyer qysh në mbrëmjen e parë të Festivalit ndërkombëtar të muzikës “DAM”. Me edicionin e 22-të Festivali vazhdon misionin për përkrahjen e muzikantë të rinj. Por të hënën ka qenë më shumë se kaq. E ka nisur kapitullin e ri me talentet e reja virtuoze dhe me shpalosjen e programit nëpërmjet teknikave tejet sfiduese.
Violinistet Mariam e Amira Abouzahra dhe e ëma e tyre pianiste Nora Emody kanë luajtur vepra tejet serioze.
Veçmas interesim ka zgjuar loja e talenteve të reja Mariam 15 vjeç dhe Amira 17 vjeç.
Repertori me veprat e hungarezit Leó Weiner, spanjollit Pablo de Sarasate, austro-amerikanit Fritz Kreisler dhe francezit Maurice Ravel ka qenë një zgjedhje me vepra melankolike, me tinguj të ndjeshëm, e ku violinat vijnë më në shprehje.
Shumicën prej veprave, motrat violiniste i kanë të memorizuara. Për hungarezen Mariam Abouzahra, njëra prej pjesëve ka qenë më e veçantë për shkak se në Amfiteatrin e Bibliotekës Universitare e ka interpretuar për herë të parë.
“Ishte kënaqësi të interpretojmë në këtë sallë shumë të mirë. Njerëzit kanë qenë shumë mikpritës, ka qenë shumë kënaqësi të interpretojmë për ta. Njëra prej pjesëve të cilën e luajta ishte ‘The last Rose of Summer’ të Ernst, ishte hera e parë që e luajta, kështu që është pjesë shumë e veçantë për mua”.
Violinistja tjetër, Amira Abouzahra, ka thënë se është ndihmesë tejet e madhe të interpretojë së bashku me motrën dhe të ëmën në skenë, veçmas kur edhe programin e përzgjedhin së bashku.
“Programin e kemi koordinuar së bashku, sepse motra ime më tregon se çfarë dëshiron të luajë dhe unë asaj më pas, shohim se si mund ta përshtatim programin. Tani është koha të luajmë edhe vepra të vështira, t’i kemi në repertor, t’i praktikojmë dhe të përfitojmë eksperiencë prej tyre”.
Krejt në fund, dy violinistet kanë improvizuar një pjesë si shprehje personale nëpërmjet lojës në instrumentet e tyre.
Pianistja e shquar hungareze, Nora Emody, ka thënë se një prej faktorëve që e kanë shijuar koncertin tej mase ka qenë publikun që sipas saj, e ka ndier muzikën në çdo melodi.
“Audienca ishte fantastike, ata bashkëndjenin me ne, kështu që e shijuam koncertin. Vajzat e mia dhe unë bëjmë muzikë qëkur ato kanë lindur. Ato janë rritur me atmosferën e kësaj muzikë dhe mendoj se kjo u jep atyre më shumë siguri. Ne kënaqemi duke bërë muzikë bashkë”.
Drejtoresha artistike e festivalit “DAM”, Rreze Kryeziu-Breznica, e ka vlerësuar koncertin si një prej më të veçantëve të këtij edicioni.
“Është për të vetmen arsye që në këtë edicion kemi vendosur t’i kthehemi misionit të edicionit të parë dhe më të mirë, më fisnik që kemi pasur ndonjëherë, promovimin e muzikëtarëve të rinj. Si më mirë do të ishte sesa ta hapim këtë edicion me virtuoze të vërteta të cilat viteve të fundit kanë prekur festivalet më virtouze në Evropë dhe më gjerë.Një program tejet sfidues, teknikisht aspak i lehtë dhe në të njëjtën kohë shumë atraktiv”.
Për treshen e muzikës klasike është hera e dytë që vijnë në Kosovë. Në qershorin e kaluar, kanë koncertuar në Prishtinë, Gjakovë, Prizren e Kamenicë. Një rrugëtim që kishte zgjatur dy ditë.
© KOHA. Të gjitha të drejtat janë të rezervuara.
