Dy aktoret veterane të skenës teatrore në Kosovë, Muradije Muriqi nga teatri i Gjakovës, “Hadi Shehu” dhe Mejreme Berisha nga Teatri i qytetit në Gjilan janë nderuar me Çmimin kombëtar për vepër jetësore. Në ceremoninë e mbajtur në kabinetin e ministrit të Kulturës, Hajrulla Çeku me rastin e Ditës Botërore të Teatrit, janë ndarë çmimet vjetore për teatër.
Çmimi Kombëtar për shfaqjen më të mirë në fushën e teatrit i është dhënë Qendrës “Multimedia” për shfaqjen “The Handke Project”. Këtë shfaqje “Multimedia” e ka dhënë në disa vende të Evropës, përfshirë edhe Beogradin. Shfaqja godet nobelistin austriak, Peter Handke, si mohues i gjenocidit të bërë nga regjimi serb.
Sipas vlerësimit të jurisë së përbërë nga Luan Jaha, Agon Myftari, Drita Begolli, Kumrije Hoxha e Alban Beqiraj, Çmimi Kombëtar për regjinë më të mirë për vitin 2022 i është ndarë regjisorit Fatos Berisha për shfaqjen “Pornography”.
Çmimi për aktoren më të mirë i është dhënë Ilire Vincës për rolin e saj te shfaqja “Babai dhe babai”.
Për prezantim të suksesshëm ndërkombëtar çmimi i ka takuar Teatrit të Gjilanit, duke marrë parasysh pjesëmarrjen nëpër festivale me shfaqjen “A.Y.L.AN”.
Laureatet Muriqi e Berisha janë shprehur mirënjohëse për vlerësimin që ju është bërë.
Pas kësaj ceremonie, një pjesë e komunitetit teatror është zhvendosur në platenë e Pallatit të Rinisë dhe Sportit. Aty Teatri Kombëtar i Kosovës ka shënuar Ditën Botërore të Teatrove. Këtë e ka bërë me inaugurimin e zyrave të reja të administratës, ku do të qëndrojnë deri në rinovimin e ndërtesës së TKK-së.
Mesazhi i Ditës Botërorë të Teatrit është lexuar nga aktori Armend Smajli. Ai pata të pranishmëve ka lexuar porosinë e aktores egjiptiane, Samiha Ayoub. Në këtë tekst, artistëve u bëhet thirrje që nëpërmjet teatrit t’i japin jetë jetës në kohën kur bota po përjeton luftëra e tragjedi të tjera.
© KOHA. Të gjitha të drejtat janë të rezervuara.
