Laureta Hajrullahu është një prej artisteve më të reja në listën e emrave që bienalja nomade “Manifesta14” ka përzgjedhur për këtë edicion.
Instalacioni i saj të fton në katin e nëntë në hotelit “Grand”. Aty ku punët artistike janë rrëfime mbi spekulimin. Muret e betonit të artistes Laureta Hajrullahu janë transformuar në një hapësirë me re.
Artistja me punën e saj shkrin botën fizike e virtuale dhe kështu e fut shikuesin midis “ëndrrës e makthit në të njëjtën kohë”. E gjithë puna e saj ka qenë e ndikuar nga pandemia Covid-19.
Ndërhyrja artistike e Laureta Hajrullahut ka sjellë butësinë në muret e dhomës. Ajo nëpërmjet tri ekraneve e shëtit mendjen e vizitorëve në pjesë të ndryshme gjeografike.
Në dhomën e saj ndjesia e përjetimit të qiellit është pushtuese. Katër ulëse të buta ofrojnë rehatinë e botës, e gjithë pamja që ofrohet janë retë, përveç tri ekraneve të renditur vertikalisht.
Ndërhyrja artistike “2D Plants/Flat Options” është hapësira intime e artistes dhe pjesë e një vëllimi më të madh të punës së saj.
Instalacioni i saj së bashku me veprat e tjera që e përbëjnë tërësinë e instalacioneve mbi spekulimet do të qëndrojë e hapur për vizitorë deri në fund të tetorit.
© KOHA. Të gjitha të drejtat janë të rezervuara.
