Delaine Mentoor e shikon waterpollon në Afrikë dhe brenda sheh një kontinent plot mundësi, nga Egjipti deri në shtëpinë e saj në Afrikën e Jugut. Mentoor dhe lojtaret e saj po shpresojnë që paraqitja e tyre historike në Lojërat Olimpike të Tokios është një shenjë e gjërave që do të vijë për sportin e tyre, vendin e tyre dhe zonën e tyre në botë. 28-vjeçarja Mentoor është femra e parë që shërbeu si trajnere e një ekipi të waterpollos në Olimpiadë, dhe Afrika e Jugut është ekipi i parë i femrave nga Afrika që garon në turneun kryesor të këtij sporti.
“Ne na duhet vetëm një avantazh i vogël sepse dua të them që mundësitë janë atje, objektet janë atje”, insistoi Mentoor.
Më shumë konkurrencë gjithashtu do të ndihmonte.
“Për sa i përket Afrikës si një e tërë, ne e dimë që Zimbabve luan, ne e dimë që Afrika e Jugut luan, kemi disa ekipe të Libisë, por këtu mbaron”, tha Mentoor. “Egjipti ka disa ekipe meshkujsh. Duhet ta rrisim waterpollon e femrave më shumë. Duhet të rritet më shumë si në vendet e tjera”.
Ndërkohë, Afrika e Jugut, një nga gjashtë vendet me ekipe në turnetë e femrave dhe meshkujve, po kalon një periudhë të vështirë në Lojërat Olimpike të Tokios.
Ekipi i meshkujve të Afrikës së Jugut, të shtunën luan ndaj Greqisë dhe deri më tani, ka një bilanc prej tri humbjeve në po aq ndeshje. Në total, ka pranuar 64 gola dhe ka shënuar vetëm gjashtë sosh.
Edhe ekipi i femrave, gjithashtu është pa fitore në tri ndeshje, ndërsa të premten u mposht nga Holanda me rezultatin e thellë 33:1. Kanë shënuar vetëm gjashtë gola, ndërsa ka pranuar 83.
“Suksesi dhe rezultati janë dy gjëra shumë të ndryshme”, tha kapitenia e Afrikës së Jugut, Jordan Ëedderburn. “Ne jemi shumë të bazuara në performancë, kështu që ne shikojmë në qëllimet tona të vogla që kemi për veten tonë. Mendoj se përvoja këtu në Tokio është e rëndësishme dhe shpresojmë që rezultatet t’i shohim pas katër vjetësh, pasi do të zhvillojmë programin tonë edhe në Afrikën e Jugut”.
Në pishinë, fuqitë e waterpollos me lehtësi po e mposhtin Afrikën e Jugut, por kur dalin nga uji, ato po bëjnë tifo për afrikano-jugorët.
“Unë do të doja që edhe vajzat e vogla në Afrikën e Jugut të luajnë waterpoll dhe shpresoj që ato të frymëzohen nga paraqitja e ekipit të tyre në Olimpiadë”, tha Maud Megens i Holandës.
Kjo është ajo që Mentoor beson gjithashtu. Madje, shpreson që në Olimpiadën e ardhshme që mbahet pas tre vjetësh në Paris, të shoh edhe ndonjë trajnere femër.
“Mezi pres të shoh edhe një femër tjetër. Shpresoj që në Paris të ketë ndonjë ekip që do t’i besoj një femre”, tha Mentoor.
© KOHA. Të gjitha të drejtat janë të rezervuara.
