Euro 2020

Bukayo Saka, nxënësi i shkëlqyeshëm që po fascinon tek Anglia

Nëse futbolli me të vërtetë “kthehet në shtëpi” të dielën, do të jetë pjesërisht falë një adoleshenti të përulur, i cili u rrit vetëm disa kilometra larg stadiumit “Wembley”, në të cilin do të zhvillohet finalja e “Euro 2020”.

Me 19 vjet e 306 ditë, Bukayo Saka as nuk ishte i lindur kur Anglia rrëmbeu zemrat e anglezëve në tentimin e saj për të triumfuar në “Euro 1996” që e organizoi vetë. Atëbotë u mposht në gjysmëfinale nga Gjermania pas penalltive 6:5, pasi koha e rregullt përfundoi me shifrat 1:1.

Nuk ishte e shkruar për Anglinë që ta prekte finalen 25 vjet më parë, pasi vrulli i saj në atë turne përfundoi kur Gareth Southgate e humbi penalltinë. Mirëpo të mërkurën mbrëma, ndërsa Anglia arriti në finalen e parë të madhe që nga viti 1966, ishte harkimi i rrezikshëm i Sakas që e detyroi kapitenin e Danimarkës, Simon Kjaerin, të shënojë autogol, me të cilin rezultati u barazua në 1:1, gjashtë minuta pa përfunduar pjesa e parë. Ky asistim shënoi një tjetër kontribut të rëndësishëm nga një adoleshent, i cili sapo ishte bërë lojtari më i ri i Anglisë që filloi një ndeshje në fazën gjysmëfinale të një turneu të madh. Para turneut, shumica e emocioneve ishin rreth talenteve sulmuese të Anglisë, Jack Grealish, Phil Foden dhe Jadon Sancho. Dhe me të drejtë ishte kështu. Por është djali që u rrit në Greenford, në perëndim të Londrës, i cili e ka fituar vendin e titullarit dhe pritet të jetë startues edhe në finale pas paraqitjeve mbresëlënëse. Qasja e patrembur e Sakas ka nxitur vlerësime nga tifozët dhe ekspertët - me një gatishmëri për të marrë topin edhe kur ndodhet nën presion, duke e kthyer zotërimin në depërtim dhe duke krijuar raste për shokët e tij të ekipit. Por rezulton se adoleshenti, i cili luan për ekipin nga Premier League, Arsenal, nuk ka treguar klasin e tij vetëm në fushën e gjelbër të “Wembley”. Saka, i cili studioi në Shkollën e Mesme të Greenfordit, e përfundoi shkollimin e mesëm me nota të shkëlqyeshme dhe si njëri prej nxënësve më të dalluar.

“Të them të drejtën, Saka ka qenë një nxënës model për të gjithë. Notat e tij gjithmonë ishin më të lartat”, tha njëri prej ish-mësuesve të tij në shkollë të mesme.

Pavarësisht aftësive të tij në klasë, fëmijëria e yllit në rritje kishte të bënte vetëm me një gjë - futbollin. Saka ka treguar se pasi mbaronte shkolla ai hante diçka dhe pastaj dilte drejt e në kopsht për të luajtur futboll me babanë dhe vëllain e tij më të madh, Yomin. Babai i Sakas kishte qenë gjithmonë tifoz i madh i futbollit dhe ka mbështetur skuadrën e Newcastles për shkak të dashurisë së madhe që e kishte për Alan Shearerin. Të tre ata luanin me orë të tëra - dhe kur babai dhe vëllai i tij donin të ktheheshin brenda në shtëpi, Saka nuk i linte.

“Ne vazhdonim të luanim derisa unë të fitoja. Unë jam serioz, ju mund t'i pyesni ata! Për sa kohë që ata ishin duke fituar, unë nuk do t'i lejoja të ktheheshin brenda”, pati thënë Saka për uebfaqen zyrtare të Arsenalit. “Kur u bëra pak më i madh, do të luaja edhe larg shtëpisë sonë. Më pëlqente të isha jashtë. Unë gjithmonë kam qenë i dhënë pas futbollit”.

Në fundjavë babai do ta merrte atë për të parë Arsenalin - ekipin me të cilin Saka nënshkroi në moshën shtatëvjeçare. Vëllai i tij, Yomi, gjithashtu u rrit si një futbollist aspirues dhe luajti si mbrojtës për Watfordin deri në moshën 14-vjeçare. Prindërit e Sakas janë me origjinë nigeriane – që do të thotë se ai mund të kishte zgjedhur të luante për kombin afrikan në vend të Anglisë.

Tani tifozët e Anglisë i janë mirënjohës që zgjodhi të qëndrojë me vendin ku lindi. Saka, i cili nuk luajti në ndeshjet e para të Evropianit kundër Kroacisë dhe Skocisë, bëri debutimin e tij në turne në duelin e fundit të fazës së grupeve të Anglisë kundër Çekisë. Ai e justifikoi përfshirjen e tij si titullar kur nxiti golin e fitores së Anglisë me një ndërprerje të shpejtë në mes të mesfushës. Saka ishte lojtari më i mirë i Anglisë në ndeshjen e 1/8 së finales kundër Gjermanisë, para se të zëvendësohej në minutën e 70-të. Ai nuk luajti në fitoren e thellë 4:0 të Anglisë ndaj Ukrainës në çerekfinale për shkak të një lëndimi që e pësoi në stërvitje. Mirëpo përzgjedhësi Gareth Southgate nuk hezitoi ta kthente titullar për gjysmëfinalen kundër Danimarkës. Dhe tani, nëse Anglia e mposht Italinë në finalen e Evropianit, atëherë Saka do të jetë ndër më të merituarit për suksesin e parë të anglezëve në një turne të madh pas 55 vjetësh pritjeje.