Zjarret e furishme që po digjen për ditë me radhë në veri të ishullit të dytë më të madh grek kanë vazhduar të shkrumbojnë pyjet edhe gjatë të martës.
Tymi i zi ka mbuluar qiellin mbi rrugët e qyteteve të afërta, teksa me qindra zjarrfikës vendorë dhe ndërkombëtarë janë angazhuar në betejën për të shpëtuar krejt çfarë mund të shpëtohet.
Zjarret të cilat nisën që nga 3 gushti janë ende aktive, ndonëse me përmasa më të vogla.
Autoritetet greke janë aktualisht të përqendruara me të gjitha burimet në flakët në Evia. Shërbimi grek i zjarrfikësve ka njoftuar se 873 zjarrfikës, 50 ekipe tokësore dhe 229 automjete kundër zjarreve janë angazhuar në operacion.
Mes tyre përfshihen edhe ekipe nga Britania e Madhe, Ukraina, Rumania, Serbia, Sllovakia dhe Polonia.
