Vullnetarët bjellorusë u bashkohen ukrainasve kundër Rusisë

Bjellorusët janë në mesin e të huajve që i janë përgjigjur thirrjes së presidentit ukrainas, Volodymyr Zelenski, për të luftuar përkrah ukrainasve kundër Rusisë. Për bjellorusët që i konsiderojnë vëllezër ukrainasit, rreziku është shumë i lartë.

Ushtria ruse ka përdorur territorin e tyre për të nisur pushtimin e Ukrainës, ndërkaq presidenti bjellorus, Alexander Lukashenko, është kukull e presidentit rus, Vladimir Putin, të cilin shpesh e ka quajtur “Vëllai i madh”.

Vullnetarët bjellorusë që po bëhen gati për luftë në Poloni, besojnë se Putini i dobësuar do ta dobësonte edhe Lukashenkon që nuk e ka lëshuar pushtetin që prej vitit 1994. Vullnetarët po stërviten në Poloni, shteti fqinj që cilësohet si parajsë për disidentët bjellorusë që në vitet e fundit kanë kritikuar ashpër Lukashenkon.

Vullnetarët bjellorusë janë duke u stërvitur nga ish-policët polakë. Polakët shpresojnë se një ditë do të vijë mundësia që edhe Bjellorusia të jetë vend demokratik. Kështu nuk ka qenë deri më tani pasi Rusia i ka ofruar Lukashenkos miliarda dollarë për të qeverisur me vendin në stilin sovjetik.