Një vaksinë anti-COVID-19 e mbështetur nga qeveria e Indisë mund të dalë në treg në shkurt, muaj më herët se që është paralajmëruar, pasi provat e fazës së fundit do të nisin këtë muaj.
Studimet deri më tash kanë treguar se vaksina është e sigurt dhe efektive, tha një zyrtar i lartë i qeverisë indiane për Reuters. Vaksina po zhvillohet nga kompania Bharat Biotech dhe atë e ka emërtuar COVAXIN. Kompania po bashkëpunon me Këshillin Indian për Kërkime Mjekësore (ICMR), që vepron në kuadër të qeverisë.
Më herët ishte paralajmëruar se vaksina do të jetë gati në tremujorin e dytë të vitit të ardhshëm. "Vaksina ka treguar efikasitet të mirë", tha të enjten shkencëtari i ICMR-së, Rajni Kant, shkruan Reuters, transmeton KOHA.
"Pritet që deri në fillim të vitit të ardhshëm, shkurt ose mars, të jetë në dispozicion", tha ai.
Rastet e infeksioneve me koronavirus në Indi u rritën me 50,201 të enjten, duke e çuar numrin e përgjithshëm në ë 8.36 milionë, që e bën vendin e dytë më të goditur pas SHBA-së. Numri i vdekjeve si pasojë e COVID-19 ka arritur në 124.315.
"Ka treguar siguri dhe efikasitet në provat e fazës 1 dhe 2 dhe në studimet mbi kafshët - kështu që është e sigurt por nuk mund të jeni 100% i sigurt nëse nuk mbarojnë provat e fazës 3," tha Kant. "Mund të ketë ndonjë rrezik, nëse jeni gati të rrezikoni, mund të merrni vaksinën. Nëse është e nevojshme, qeveria mund të mendojë të japë vaksinën në një situatë emergjente”.
Ministri i Shëndetësisë Harsh Vardhan tha në shtator qeveria po shqyrtonte dhënien e një autorizimi urgjent për një vaksinë COVID-19, veçanërisht për të moshuarit dhe njerëzit në vendet e punës me rrezik të lartë.
