Turistët e huaj evakuohen nga hotelet e rrezikuara nga zjarret në Turqi

Turistët e huaj janë evakuuar nga plazhet në jug-perëndim të Turqisë, ku zjarret e mëdha tashmë po kërcënojnë hotelet dhe shtëpitë.

Anijet e rojeve bregdetare turke, të ndihmuara nga anije private dhe jahte janë angazhuar për të dërguar pushuesit në zona të sigurta, kanë bërë të ditur mediat lokale në Turqi.

Në qytetin e Bodrumit, tri hotele me pesë yje raportohet të jenë evakuuar plotësisht. Zjarret të cilat kanë nisur të mërkurën e kaluar, kanë lënë deri më tani gjashtë persona të vdekur.

Dy raste të reja me fatalitet janë shënuar vetëm të shtunën. Dy viktimat ishin në mesin e mijëra njerëzve që kanë luftuar pothuajse 100 zjarre të veçanta në vendpushimet dhe fshatrat në brigjet Mesdhetare dhe Egje të Turqisë, që është një rajon i madh turistik.

Zyrtarët turq kanë bërë të ditur se 10 nga të gjitha zjarret e lokalizuara, nuk janë vënë ende nën kontroll.

Ndërkohë, pamjet e publikuara nga i pari i qytetit të Bodrumit tregojnë zjarret të cilat janë aktive edhe në orët e hershme të së dielës.