Taksisti Lars-Goran Goransson pranon se ka frikë sa herë që vë dorezat dhe merr me kujdes një mostër të dyshimtë për COVID-19, që është marrë pak çaste më herët në periferi të Stockholmit. Ai e ngre lart mostrën që është lënë para derës së një shtëpie.
“Mendoj se është mënyrë e sigurt për të punuar, por kam pak frikë”, ka thënë Goransson 55-vjeçar, një nga 1.000 “taksistët e koronës” që siguron jetesën duke transportuar mostra të COVID-19 mes shtëpive dhe laboratorëve ku testohen ato në Stockholm.
Që nga fillimi i pandemisë, firmat private të taksive kanë transportuar më tepër se 250 mijë mostra të COVID-19, një iniciativë që taksistët i bën pjesë të rëndësishme të regjimit testues në Stockholm.
Kjo u ka siguruar taksistëve njëherit një burim në një periudhë të krizë, ku numri i udhëtarëve është dukshëm më i vogël.
Sipas iniciativës, të udhëhequr nga autoriteti nacional shëndetësor, taksistë – shumica imigrantë – marrin nga 37 dollarë në orë, pak më tepër se një udhëtim standard nëpër qendër të Stockholmit.
Suedia, që ndjeki një strategji më ndryshe duke evituar mbylljen totale për ta luftuar koronavirusin, fillimisht ishte më e ngadalshme në testime, por rriti nivelin e testimit gjatë verës.
Shifra e të vdekurve nga koronavirusi është 6555, dukshëm më e lartë për kokë banori sesa te fqinjët tjerë Nordik.
Puna rutinore e Goranssonit tash përfshin uljen në gjunjë për të marrë një pako me strisho të marra dhe duke i dezinfektuar më pas duart.
Zakonisht, njerëzit marrin rezultatet brenda 24 orëve nga vizita e “taksistit të koronës”, të cilin mund as mos ta njohin, pasi synimi është të evitohet kontakti i afërt.
Goransson është krenar që po asiston Suedinë në luftën kundër pandemisë, duke thënë se testimi më i shpejt mund të ndihmojë të frenohet virusi, por atij i mungon kontakti me njerëz.
“Normalisht është një punë shumë sociale kjo e taksistit. Kam qenë taksist për 20 vjet dhe pjesa më e mirë e punës është takimi me njerëz”, ka thënë Goransson.
