Sekretari i Përgjithshëm i NATO-s, Jens Stoltenberg ka mirëpritur zgjatjen e armëpushimit mes Izraelit dhe Hamasit.
Stoltenbergu ka folur para gazetarëve përpara një takimi të ministrave të jashtëm në selinë e NATO-s në Bruksel. Gjatë samitit dy-ditor, ministrat do të diskutojnë një sërë çështjesh të sigurisë, duke filluar nga mbështetja e vazhdueshme për Ukrainën, lufta midis Izraelit dhe Hamasit dhe pranimi i Suedisë në NATO.
Izraeli dhe Hamasi ranë dakord të hënën që të zgjasin armëpushimin e tyre për dy ditë të tjera, duke rritur kështu mundësinë e shkëmbimeve të mëtejshme të pengjeve të mbajtura nga militantët në këmbim të palestinezëve të burgosur nga Izraeli.
