Stafi diplomatik amerikan është larguar nga Konsullata Amerikane në Chengdu, pasi ka skaduar afati përfundimtar prej 72 orëve që i kishin dhënë autoritetet kineze, shkruan BBC.
Kina ka urdhëruar mbylljen e kësaj konsullate, në reagim ndaj vendimit të SHBA-së për të mbyllur Konsullatën Kineze në Houston, Teksas, javën e kaluar.
Para afatit përfundimtar të hënën, stafi është parë duke u larguar nga ndërtesa, pllaka është larguar dhe flamuri i SHBA-së është ulur.
Ministri i Jashtëm i Kinës ka thënë se stafi kinez është futur në ndërtesë pas afatit përfundimtar dhe e ka marrë ndërtesën.
“Konsullata ka qenë në qendër të marrëdhënieve tona me njerëzit në perëndim të Kinës, përfshirë ata në Tibet, për 35 vjet. Ne jemi të zhgënjyer me vendimin e Partisë Komuniste të Kinës dhe do të përpiqemi ta vazhdojmë kontaktin me njerëzit në këtë rajon të rëndësishëm nëpërmjet posteve tona tjera në Kinë”, ka thënë zëdhënësi i Departamentit të Shtetit të SHBA-së.
Ndërsa Konsullata e SHBA-së është mbyllur, qytetarët janë mbledhur jashtë objektit, ku shumë valonin flamujt kinezë dhe bënin selfie.
Pekini ka urdhëruar mbylljen e konsullatës pasi Konsullata e Kinës në Houston ishte mbyllur nga SHBA-ja, me akuzë se është përdorur si vend për spiunim.
Tensionet mes dy shteteve janë rritur në kohët e fundit për një sërë çështjesh.