Ushtria amerikane ka rrëzuar edhe një tjetër objekt fluturues të paidentifikuar, këtë herë mbi liqenin Huron, që gjendet pranë kufirit kanadez, raportoi BBC-ja të dielën.
Objekti u rrëzua nga pilotët e Forcave Ajrore dhe të Gardës Kombëtare, njoftoi kongresistja e Michiganit, Elissa Slotkin.
“Punë e madhe nga të gjithë ata që e kryen këtë mision”, tha ajo.
Washingtoni ka qenë në gatishmëri të plotë qëkur ushtria shkatërroi një balonë të dyshimtë kineze më 4 shkurt. Ky është incidenti i katërt brenda shkurtit.
Komandanti i Komandës Veriore të SHBA-së, gjenerali Glen VanHerck tha se nuk kishte asnjë tregues për ndonjë kërcënim.
Edhe
Sulme të reja mes SHBA-së dhe Iranit, tensionet afrohen drejt një lufte të hapur
"Unë nuk do t'i kategorizoj si balona. Ne i quajmë objekte për një arsye," tha ai. "Ajo që ne po shohim është objekte shumë, shumë të vogla që prodhojnë një seksion tërthor radar shumë, shumë të ulët," shtoi ai.
Spekulimet se cilat mund të jenë objektet janë intensifikuar ditët e fundit.
“Unë do t'i lë komunitetit të inteligjencës dhe komunitetit të kundërzbulimit ta kuptojnë këtë”, tha gjenerali VanHerck kur u pyet nëse ishte e mundur që objektet të jenë alienë apo jashtëtokësorë. “Nuk kam përjashtuar asgjë në këtë pikë”.
Një balonë e dyshuar spiune kineze u rrëzua në brigjet e Karolinës së Jugut më 4 shkurt, pasi qëndroi pezull për ditë të tëra mbi SHBA. Zyrtarët thanë se e kishte origjinën në Kinë dhe ishte përdorur për të monitoruar vendet e ndjeshme.
Kina mohoi se objekti ishte përdorur për spiunim dhe tha se ishte një pajisje monitoruese e motit që kishte humbur rrugën.
Por të dielën, një zyrtar i mbrojtjes tha se SHBA kishte komunikuar me Pekinin për objektin e parë, pasi nuk mori asnjë përgjigje për disa ditë. Nuk ishte menjëherë e qartë se çfarë u diskutua.
Që nga incidenti i parë, avionët luftarakë amerikanë kanë rrëzuar tre objekte të tjera në lartësi të madhe në po aq ditë.
Edhe
Vritet një ushtar amerikan e një tjetër plagoset pas një sulmi iranian në Irak
Presidenti i SHBA-së, Joe Biden urdhëroi që të rrëzohej një objekt mbi veriun e Alaskës të premten, dhe të shtunën një objekt i ngjashëm u rrëzua mbi Yukon në veriperëndim të Kanadasë.
Si SHBA-ja ashtu edhe Kanadaja janë ende duke punuar për të rikuperuar mbetjet, por kërkimi në Alaskë është penguar nga kushtet e Arktikut.
