Presidenti libanez i bën thirrje Hezbollahut të çarmatoset

Presidenti i Libanit, Joseph Aoun, i ka bërë thirrje grupit militant Hezbollah dhe partive të tjera politike të enjten që t’ia dorëzojnë armët e tyre ushtrisë, lëvizje kjo që po kundërshtohet nga lidershipi i ri i grupit, teksa Shtetet e Bashkuara të Amerikës kanë shtuar trysninë për asgjësimin e plotë të arsenalit.

“Është detyra e të gjitha partive politike....që ta shfrytëzojnë këtë mundësi historike pa hezitim dhe të angazhohen që këto armë të përfundojnë në duart e ushtrisë dhe forcave të sigurisë, dhe askujt tjetër”, ka deklaruar Aoun gjatë një fjalimi televiziv.

Hezbollahu, i cili doli i dëmtuar rëndë nga lufta me Izraelin vitin e kaluar, ka bërë të ditur se thirrjet për çarmatosjen e grupit, që është në aleancë me Iranin, i shkojnë për shtati vetëm Izraelit.

“Ata që kërkojnë dorëzimin e armëve praktikisht kërkojnë dorëzimin e tyre te Izraeli… Ne nuk do të dorëzohemi ndaj Izraelit”, është shprehur të mërkurën shefi i grupit, Sheikh Naim Qassem.

Shtetet e Bashkuara e kanë shtyrë Libanin që të formulojë një vendim të qeverisë që angazhohet për çarmatosjen e Hezbollahut para se të rifillojnë bisedimet për ndalimin e operacioneve ushtarake izraelite në vend, kanë njoftuar pesë burime të afërta me agjencinë e lajmeve Reuters.

Aoun ka shtuar se një propozim për Washingtonin, që do t’i prezantohet kabinetit qeveritar javën e ardhshme, thekson se Izraeli duhet të ndalojë sulmet ndaj Libanit dhe të tërhiqet nga pozicionet që mban në jug të vendit, krahas dorëzimit të armëve të Hezbollahut në duart e ushtrisë libaneze.

Propozimi synon të sigurojë nga 1 miliard dollarë për çdo vit në 10-vjeçarin e ardhshëm si mënyrë për ta fuqizuar ushtrinë dhe forcat e sigurisë, si dhe përfshin plane për organizimin e një konference ndërkombëtare që do të mbahet më vonë gjatë këtij viti për të mbështetur përpjekjet e rindërtimit në Liban.