Papa Leo mohon se kritikat ndaj “tiranëve të luftës” ishin për Trumpin

Papa Leo ka mohuar se kritikat e tij ndaj “tiranëve” që shpenzojnë miliarda për luftëra ishin të drejtuara ndaj presidentit amerikan Donald Trump, duke theksuar se fjalimi ishte përgatitur javë më parë.

“U duk sikur po përpiqesha të debatoja me presidentin, por kjo nuk është aspak në interesin tim,” u shpreh Papa gjatë një fluturimi drejt Angola, duke sqaruar se deklaratat e tij i paraprinin komenteve të Trumpit.

Tensionet u rritën pasi Trumpi e kishte kritikuar ashpër Papën në fillim të javës, duke e cilësuar si “të dëmshëm për politikën e jashtme”, në një përplasje publike që lidhet edhe me qëndrimet e Papës ndaj operacioneve ushtarake të SHBA-së dhe Izraelit në Iran.

Gjatë një fjalimi në Kamerun, Papa dënoi liderët që, sipas tij, injorojnë faktin se miliarda dollarë shpenzohen për luftëra, ndërsa mungojnë fondet për shëndetësi, arsim dhe rindërtim.

“Zotërinjtë e luftës bëjnë sikur nuk e dinë se shkatërrimi ndodh në një çast, por rindërtimi shpesh kërkon një jetë të tërë,” deklaroi ai, duke kritikuar ciklin e vazhdueshëm të dhunës dhe destabilizimit.

Papa gjithashtu dënoi situatën në një rajon të përgjakur të Kamerunit, i përfshirë nga një kryengritje që zgjat prej gati një dekade, duke e cilësuar si një cikël të pafund destabilizimi dhe vdekjeje.