Kuba fillon vaksinimin e fëmijëve mbi 2 vjeç

Qeveria kubane ka filluar të vaksinojë fëmijët e moshës dy vjeçare kundër COVID-19, njoftuan mediat shtetërore, si përpjekje për t’i kthyer fëmijët përsëri në klasa.

Ndërsa vendet e tjera kanë thënë se përfundimisht do të vaksinojnë fëmijët, Kuba besohet të jetë e para që u dha vaksinat fëmijëve të vegjël. Në shtator, ajo deklaroi se vaksinat e saj vendase ishin të sigurta për t'ua dhënë fëmijëve të vegjël.

Gjatë gjithë pandemisë, shumica e klasave me pjesëmarrje fizike janë pezulluar në ishull. Në vend që të shkojnë në shkollë, fëmijët shikojnë programe edukative në televizor për orë të tëra çdo ditë.

Kuba është përqendruar kryesisht në zhvillimin e vaksinave të veta, në vend që të varet nga vendet e tjera. Shkencëtarët vendas thonë se vaksinat e bëra nga Kuba janë të sigurta dhe efektive, por deri më tani kanë dhënë pak të dhëna për vëzhguesit e jashtëm. Qeveria ka thënë se do të kërkojë miratimin e OBSH-së për vaksinat e saj, raporton CNN.

Deri më sot, sipas Ministrisë kubane të Shëndetësisë, mbi katër milionë njerëz janë vaksinuar plotësisht, por nuk dha shifra për fëmijë.