Merr fund pushteti 16-vjeçar i Orbanit, Magyar fiton zgjedhjet në Hungari

Viktor Orban ka pranuar humbjen në zgjedhjet e të dielës në Hungari, duke i dhënë fund pushtetit të tij 16-vjeçar. Orbani e ka quajtur të dhimbshëm rezultatin e zgjedhjeve të së dielës, ku partia opozita Tisza e Peter Magyarit ka dominuar. 

Magyari është projektuar të marrë 2/3 e ulëseve në Parlamentin e Hungarisë të përbërë nga 199 deputetë. Kur janë numëruar rreth 96 për qind të votave, Tisza parashihet të marrë 138 ulëse, karshi 55 sa do t’i marrë Fidesz e 6 Mi Hazank. 

“Faleminderit Hungari!” – ka shkruar Magyar në rrjete sociale, ndërsa ai paraprakisht kishte mbajtur edhe konferencë për media. 

E Orban u ka thënë përkrahësve të tij se “e ka uruar partinë fituese”. 

“Ne do t’i shërbejmë kombit hungarez dhe vendit tonë edhe nga opozita”, tha Orban. 

Është një goditje e madhe për Orbanin, udhëheqësin më jetëgjatë të një shteti anëtar të Bashkimit Evropian dhe një nga kundërshtarët e tij më të mëdhenj, i cili ka bërë një rrugë të gjatë nga ditët e tij të hershme si një figurë liberale dhe antisovjetike deri te nacionalisti miqësor me Rusinë, i admiruar sot nga e djathta ekstreme globale.

Partitë e Orbanit dhe të Magyarit thanë se kishin marrë raportime për shkelje zgjedhore, duke sugjeruar se disa rezultate mund të kundërshtohen nga të dyja palët.

Qendrat e votimit u hapën në orën 6 të mëngjesit dhe u mbyllën në orën 19:00. Dalja ishte rekorde, mbi 78 për qind. 

Këto zgjedhje ishin konsideruar si një zgjedhje mes “Perëndimit dhe Lindjes”. 

Orbani ka penguar vazhdimisht përpjekjet e Bashkimit Evropian për ta mbështetur Ukrainën në luftën e saj kundër pushtimit në shkallë të plotë nga Rusia, ndërsa ka kultivuar lidhje të ngushta me presidentin rus Vladimir Putin dhe ka refuzuar t’i japë fund varësisë së Hungarisë nga importet ruse të lëndëve djegëse fosile.

Zbulimet e fundit kanë treguar se një anëtar i lartë i qeverisë së tij shpesh ka ndarë përmbajtjen e diskutimeve të BE-së me Moskën, duke ngritur akuza se Hungaria po vepronte në emër të Rusisë brenda bllokut.

Zgjedhjet u ndoqën nga afër në vende në të gjithë Evropën dhe më gjerë, gjë që dëshmon për rolin jashtëzakonisht të madh që Orbani zë në politikën populliste të së djathtës ekstreme në mbarë botën.
Në Budapest, por edhe në qytete tjera të Hungarisë ka pasur festë pas fitores së Tiszas. 
E partia e Magyarit ka marrë urime, përfshirë nga kancelari gjerman Friedrich Merz e presidentin francez Emmanuel Macron. 

Merz ka thënë se po shikon para të punojë me Magyarin dhe shpreson “t’i bashkojë forcat për një Evropë të fortë, sigurt dhe mbi të gjitha të bashkuar”. 

Orban pranon humbjen, uron Magyarin

Viktor Orbani ka pranuar humbjen në zgjedhjet nacionale në Hungari të mbajtura të dielën. Orbani ka thënë se rezultati i zgjedhjeve është i qartë dhe se e pranon humbjen, raporton "The Guardian". Ai ka treguar se e ka uruar Peter Magyarin për fitoren.

“Urova partinë fituese. Ne do t’i shërbejmë kombit hungarez dhe atdheut tonë edhe nga opozita”, tha Orban.

E edhe Magyari në postim në Facebook e ka pranuar se Orbani e ka uruar për fitore. 

Orbanit i ka mbaruar udhëheqja 16-vjeçare në Hungari. Ai ka thënë se rezultati është I dhimbshëm për partinë e tij Fidesz. 

Kur janë numëruar mbi 60 për qind të votave, Tisza parashihet të marrë 136 ulëse në Parlament, ndërsa Fidesz 56 ulëse

 Numërohen mbi 50 për qind të votave, Tisza parashihet të marrë 136 ulëse

Janë numëruar 53.45 për qind të votave, ndërsa partia Tisza e Peter Magyarit po parashihet të marrë 136 ulëse në Parlamentin e Hungarisë, që do të jetë 2/3 e nevojshme. 
Fideszi i Viktor Orbanit do të marrë 56 ulëse, ndërsa Mi Hazank 7 ulëse. 
 

Numërohen mbi 37 për qind të votave, Tisza projektohet të fitojë 132 ulëse

Janë numëruar mbi 37 për qind të votave në zgjedhjet nacionale në Hungari, ndërsa partia Tisza e Peter Magyarit projektohet të fitojë 132 ulëse në Parlamentin e Hungarisë, vetëm një ulëse larg shumicës prej dy të tritave. Fideszi i Viktor Orbanit projektohet të fitojë 598 ulëse ndërsa Mi Hazank 8 ulëse. 

Magyar pas konferencës për media ka bërë edhe një postim në Facebook. 
“Faleminderit Hungari!” – ka shkruar ai. 
 

Numërohen mbi 21 për qind të votave, Tisza e Magyarit po udhëheq bindshëm

Janë numëruar 21.54 për qind të votave, ndërsa partia Tisza e Peter Magyarit po projektohet të marrë 128 ulëse, është 5 ulëse më pak se 133 sa duhet për të pasur shumicën prej dy të tretave, shkruan "The Guardian".  Fideszi i Viktor Orbanit projektohet të ketë 62 ulëse e Mi Hazank 8 ulëse. 
 

Sondazhet tregojnë se Magyar po shkon drejt fitores së madhe

Dy sondazhe opinioni e nxjerrin fitues partinë Tisza në zgjedhjet nacionale në Hungari, që nënkupton se Peter Magyar do ta rrëzojë pas 16 vjetëve Viktor Orbanin nga posti i kryeministrit, raporton BBC. 

Sondazhi i Median e vendos partinë e Magyarit si fituese bindëse me 57.1 për qind të votave. Kjo do të nënkuptonte se partia Tisza do të ketë 135 ulëse. 

Ndërkohë ky sondazh sugjeron se partia e Orbanit, Didesz do t’i ketë 37.1 për qind të votave. 

E Research Center e nxjerr Tiszan fituese me 55 për qind të votave, ndërsa Fideszin në vend të dytë me 38 për qind. 

Dalja në zgjedhje ka thyer rekord. Kanë dalë rreth 78 për qind. 
Magyar në konferencë për media e ka quajtur ditë historike të dielën. Ai ka falënderuar gjithë votuesit, ndërsa ka thënë se është “optimist por i kujdesshëm”, pasi sondazhet e kanë nxjerrë fitues. 
 

Thyhet rekordi i daljes së qytetarëve në zgjedhjet në Hungari

Dalja e qytetarëve në zgjedhjet parlamentare në Hungari ka thyer rekord. Shifra e pjesëmarrjes deri në orën 17:00 është 74.23%, një rekord për zgjedhje në Hungari.

Herën e kaluar në vitin 2022 ishte 62.92%, dhe me më shumë se një orë deri në mbylljen e qendrave të votimit, pjesëmarrja tashmë e ka tejkaluar nivelin më të lartë të mëparshëm prej 73.51% në vitin 2002.

Analisti politik Gábor Török sugjeron se mund të shkojë deri në 80% pjesëmarrje kur të mbyllen qendrat e votimit.

Kjo nuk do të thotë domosdoshmërisht se favorizon një parti mbi një tjetër megjithatë është lajm i keq për partinë e ekstremit të djathtë “Our Homeland” dhe parti të tjera më të vogla që kanë nevojë për 5% të votave për të hyrë në parlament.

Partia e Péter Magyar, Tisza, ka thënë se kjo është lajm i mirë për opozitën, por të dy liderët po u bëjnë thirrje votuesve të shkojnë në qendrat e votimit deri në orën 19:00.

Thirrja e Viktor Orbán në rrjetet sociale:

“Ka shumë njerëz që po votojnë. Kjo do të thotë vetëm një gjë. Nëse duam të mbrojmë sigurinë e Hungarisë, asnjë patriot nuk duhet të qëndrojë në shtëpi!”

Ndërkohë Magyar thotë:

“Tani duhet të japim gjithçka! Votoni dhe inkurajoni të gjithë ta bëjnë këtë. Çdo votë mund të jetë vendimtare!”

Qendrat e votimit janë ende të hapura edhe për më shumë se një orë.

Zgjedhjet në Hungari, deri në ora 15:00 votuan 66 për qind të votuesve

Dalja në zgjedhjet parlamentare në Hungari po pritet të thyej rekord. Sipas të dhënave të autoritetit të zgjedhjeve në Hungari deri në ora 15:00 dalja ishte 66 për qind.

Krahasuar me daljet në ora 15:00 nga zgjedhjet e kaluara, në këto zgjedhje po pritet të thyhet rekord, raporton BBC.

Qendrat e votimit janë hapur në ora 6:00 ndërsa do të mbyllen në ora 19:00.

Viktor Orbanit po i rrezikohet sundimi 16-vjeçar. Peter Magyar po e sfidon atë.

Hungarezët vendosin nëse do t'i japin fund 16 viteve të sundimit të Orbanit

Hungarezët do të votojnë të dielën në atë që konsiderohet si një nga proceset zgjedhore më të rëndësishme në Evropë këtë vit, një votim që mund të largojë nga pushteti kryeministrin populist Viktor Orban, pas 16 vjetësh në krye të vendit. Ai njihet si aleat i presidentit amerikan Donald Trump.

Këto zgjedhje janë shumë të rëndësishme për Orbánin, i cili është lideri më jetëgjatë në Bashkimin Evropian dhe shpesh në konflikt me të. Ai ka kaluar nga një politikan liberal dhe kundër Bashkimit Sovjetik në fillimet e tij, në një nacionalist të afërt me Rusinë dhe të pëlqyer nga e djathta ekstreme në botë.

Qendrat e votimit u hapën në orën 06:00 të mëngjesit dhe priten të mbyllen në orën 19:00. Orbán dhe kundërshtari i tij kryesor, Péter Magyar, priten të votojnë gjatë paradites.

Zgjedhjet po ndiqen me vëmendje të madhe në Evropë dhe më gjerë, për shkak të rolit të madh që Orbáni ka në politikën populiste të djathtë.

Mbështetës të lëvizjes “Make America Great Again” të Donald Trump e shohin qeverinë e Orbánit dhe partinë e tij Fidesz si shembull të politikave konservatore dhe kundër globalizmit. Ndërkohë, mbështetësit e demokracisë liberale dhe sundimit të ligjit e kritikojnë ashpër atë.

Pas orës së parë të votimit, 3.6% e votuesve të regjistruar kanë votuar, sipas Zyrës Kombëtare të Zgjedhjeve. Ky është një rekord në historinë e Hungarisë pas periudhës socialiste dhe pothuajse dyfish më i lartë se në të njëjtën kohë në zgjedhjet e vitit 2022.