Një gjykatë në Bruksel ka dënuar me gjobë ish-mbretin e Belgjikës, Albert II me arsyetimin se nuk ka kryer testin e ADN-së kërkuar për të sqaruar atësinë ose jo mbi artisten Delphine Boel.
Gjykata e Apelit ka vendosur që ish-mbreti, Albert II të paguajë 5 000 euro çdo ditë deri në momentin kur ai të kryejë testin e ADN-së.
Në nëntor të vitit të kaluar, gjykata në seancën e hapur mbi pretendimet e Boel, vendosi që ish-mbreti Albert II duhej t’i nënshtrohej një testi ADN-je brenda tre muajve.
Ndërkohë, ish-mbreti Albert II ka refuzuar këtë vendim të gjykatës dhe nuk ka bërë testin e ADN-së.
Mbreti 84-vjeçar, i cili në vitin 2013 ia dorëzoi fronin djalit të tij Philippe, thotë se artistja 51-vjeçare Boel nuk është vajza e tij. Ndërkohë që Boel që prej 10 vitesh ngre padi të ndryshme për të provuar se mbreti është babai i saj.
Ish-mbreti nuk ka imunitet ndaj vendimeve të gjykatës./Atsh/
