Presidenti amerikan, Joe Biden, ka shprehur mbështetjen të premten për udhëheqësin e shumicës në Senat, Chuck Schumer, pasi senatori bëri thirrje për zgjedhje të reja në Izrael, shenja më e fundit se marrëdhënia e SHBA-së me aleatin e saj më të ngushtë në Lindjen e Mesme po shkon drejt thyerjes për luftën në Gazë.
Schumer, një demokrat hebre nga Nju Jorku, shkaktoi reagime në të dy vendet këtë javë kur tha se kryeministri izraelit, Benjamin Netanyahu "ka humbur rrugën" ndërsa numri i të vdekurve palestinezë vazhdon të rritet, raportoi AP.
"Ai bëri një fjalim të mirë. Unë mendoj se ai shprehu shqetësime serioze të përbashkëta jo vetëm nga ai, por nga shumë amerikanë”, ka thënë Bideni në Zyrën Ovale gjatë një takimi me kryeministrin e Irlandës.
Presidenti demokrat nuk e përsëriti thirrjen e Schumerit që Izraeli të mbajë zgjedhje, një hap që ka të ngjarë t'i japë fund mandatit të Netanyahut për shkak të pakënaqësisë në rritje me udhëheqjen e tij. Por komentet e Bidenit pasqyrojnë zhgënjimin e tij me një kryeministër izraelit i cili ka penguar përpjekjet për të zgjeruar ndihmën humanitare në Gazë dhe ka kundërshtuar krijimin e një shteti të pavarur palestinez.
Pika e fundit e fërkimit ka qenë qëllimi i Izraelit për të ndjekur Hamasin në Rafah, një qytet në Gazën jugore ku 1.4 milionë palestinezë të zhvendosur kanë ikur për të shmangur luftimet në veri. Zyra e Netanyahut ka bërë të ditur të premten se miratoi një operacion ushtarak që do të përfshinte evakuimin e civilëve, por zyrtarët amerikanë janë të shqetësuar për potencialin për një valë të re gjakderdhjeje.
Sekretari amerikan i Shtetit, Antony Blinken, duke folur nga Viena të premten ka thënë se SHBA-ja nuk e ka parë ende planin e Netanyahut për sulmin në Rafah.
"Ne duhet të shohim një plan të qartë dhe të zbatueshëm për të mbrojtur njerëzit e pafajshëm nga një inkursion izraelit. Ne nuk kemi parë një plan të tillë”, ka thënë Blinken.
Edhe
Biden: Netanyahu s’po bën mjaft për marrëveshjen e pengjeve
Megjithatë, Blinken ka deklaruar se bisedat e ashpra midis liderëve izraelitë dhe amerikanë nuk nënkuptojnë se aleanca po prishet.
"Kjo është në fakt forca e marrëdhënies, të jesh në gjendje të flasësh qartë, çiltër dhe drejtpërdrejt”, është shprehur ai.
