Presidenti i SHBA-së, Joe Biden ka thënë të premten në samitin e OKB-së COP27 se është detyrë dhe përgjegjësi e çdo kombi të veprojë për klimën.
Bideni foli në Egjipt pasi zgjedhjet afatmesme në SHBA dhanë rezultate më të mira se sa pritej për presidentin, raportoi BBC-ja të premten.
Ai pretendoi se SHBA-ja është një lider global për klimën pasi miratoi ligje gjithëpërfshirëse për të trajtuar ngrohjen globale.
“Kriza klimatike ka të bëjë me sigurinë njerëzore, sigurinë ekonomike, sigurinë mjedisore, sigurinë kombëtare dhe vetë jetën e planetit”, tha Biden.
Ai u bëri jehonë komenteve të kryeministrit të Mbretërisë së Bashkuar, Rishi Sunak të hënën se lufta e Rusisë në Ukrainë është një arsye për të vepruar më shpejt në lidhje me klimën.
Duke vënë në dukje se tetë vitet e fundit kanë qenë më të ngrohtat e regjistruara, ai përshkroi ndikimet e ndryshimit të klimës në vendet e Afrikës, duke përfshirë një thatësirë katërvjeçare në Bririn e Afrikës.
Bideni premtoi të shtrëngojë rregullat e SHBA-së për emetimet e metanit nga kompanitë e naftës dhe gazit. Metani është gazi më i fuqishëm serrë dhe kontribuon ndjeshëm në ngrohjen e atmosferës së Tokës.
"Sot, falë veprimeve që kemi ndërmarrë, unë mund të qëndroj këtu si president i Shteteve të Bashkuara të Amerikës dhe të them me besim, se SHBA-ja do të përmbushë objektivat e emetimeve deri në vitin 2030”, ka thënë ai.
Ai gjithashtu premtoi më shumë para për vendet më të varfra që vuajnë nga fatkeqësitë klimatike, duke përfshirë thatësirën dhe përmbytjet.