Aktakuzë ndaj ish-kancelarit austriak Kurz për rastin e korrupsionit

Prokuroria e Vjenës ka ngritur aktakuzë ndaj ish-kancelarit Sebastian Kurz në lidhje me deklaratat e rrejshme në rastin e korrupsionit gjatë mandatit të tij si kancelar i vendit. Në rast se shpallet fajtor, Kurz mund të dënohet deri në tre vjet burgim

Ish-kancelari austriak Sebastian Kurz, do të përballet me aktakuzë për deklarata të rrejshme gjatë hetimit parlamentar në lidhje me dyshimet për korrupsion në qeverinë e tij të parë në vitin 2019.

Në një postim në rrjetin social “Twitter”, Kurz ka mohuar akuzat, të cilat i ka cilësuar si të pabaza.

Kurz do të përballet me drejtësinë së bashku me ish-shefin e stafit të tij, Bernhard Bonelli dhe një person tjetër, ka njoftuar prokuroria në Vjenë. Gjykimi ndaj Kurzit do të nisë më 18 tetor.

Aktakuza është rezultat i hetimit që ka nisur në vitin 2021 kur Kurz ishte ende kancelar. Ka të bëjë me dëshminë e tij në hetimin për korrupsion në koalicionin të cilit i priu nga viti 2017, kur partia e tij konservatore formoi koalicionin me partinë e krahut të djathtë ekstrem.

Kurzi dha dorëheqje nga qeveria kur u shfaq videoja në të cilën shiheshin zëvendëskancelari, Heinz-Christian Strache, që i ofronte favore një investitori të supozuar rus.

Në rastin e korrupsionit, Kurz akuzohet se ka ofruar prova të rreme në qershorin e vitit 2020 në lidhje me rolin që pati në krijimin e kompanisë OeBAG, e cila administronte rolin e shtetit në disa kompani dhe emërimin e udhëheqësve të saj.

Në rast se shpallet fajtor për deklarata të rreme Kurz mund të dënohet deri në tre vjet burgim.

Të premten në një konferencë për media, pasardhësi i tij, kancelari Karl Nehammer ka thënë se gjykimi më në fund është mundësi për të qartësuar gjërat.

Zgjedhjet në Austri mbahen gjatë vitit të ardhshëm. Në sondazhet e fundit prinë partia e Lirisë, e ekstremit të djathtë.