Fico në gjendje të qëndrueshme por të rëndë, thonë zyrtarë të spitalit

Kryeministri sllovak, Robert Fico, është në gjendje të qëndrueshme por ende të rëndë, kanë deklaruar të enjten zyrtarë të spitalit ku po trajtohet, pasi u sulmua me armë zjarri një ditë më parë.

Mjekët janë duke vazhduar trajtimin e Ficos, në një përpjekje për ta përmirësuar gjendjen e tij, ka thënë ministri sllovak i Mbrojtjes, Robert Kalinak, raporton AP.

Nga qeveria kanë thënë se Fico është qëlluar pesë herë të mërkurën, jashtë një qendre kulturore, derisa po takonte me mbështetësit e tij.

I dyshuari është dërguar në mbajtje, derisa një hetim fillestar ka gjetur “motiv të pastër politik” prapa përpjekjes për vrasje, ka deklaruar të mërkurën ministri i Brendshëm, Matus Sutaj Estok.  

Fico ka qenë prej kohësh një figurë përçarëse në Sllovaki dhe më gjerë, por rikthimi i tij vitin e kaluar me një mesazh pro-rus dhe anti-amerikan, çoi në shqetësime edhe më të mëdha midis anëtarëve të tjerë të Bashkimit Evropian se ai do ta çonte vendin e tij larg rrjedhave kryesore të Perëndimit.