Mbretëresha Elizabeta II është përballur me tentim vrasje gjatë një vizite në vitin 1983 në SHBA, kanë zbuluar dokumentet e FBI-së.
Byroja Federale e Hetimit ka publikuar një dosje dokumentesh lidhur me udhëtimet e mbretëreshës në SHBA, pas vdekjes së saj vitin e kaluar.
Ato tregojnë se si FBI-ja, e cila ndihmoi në sigurinë e saj gjatë vizitave, ishte e shqetësuar për kërcënimet e IRA-s
Kërcënimi për vrasje iu ishte bërë një oficeri policie në San Francisco.
Sipas dokumenteve, një polic i cili frekuentonte një klub irlandez në San Francisco paralajmëroi agjentët federalë për një thirrje nga një burrë të cilin e kishte takuar aty.
Polici tha se burri i kishte treguar se ai po kërkonte hakmarrje për vajzën e tij e cila “ishte vrarë në veri të Irlandës nga një plumb”.
Kërcënimi u bë më 4 shkurt 1983 – rreth një muaj para se Mbretëresha Elizabeta II dhe bashkëshorti i saj, Princ Philip, të vizitonin Kaliforninë, shkroi BBC.
“Ai do të tentonte ta lëndonte Mbretëreshën Elizabeta dhe këtë do ta bënte duke lënë një objekt te ura Golden Gate mbi Jahtin Royal Britannia kur ai do të lundronte poshtë, ose do të tentonte ta vriste kur të vizitonte Parkun Kombëtar Yosemite”, thuhet në dokument.
Në përgjigje ndaj kërcënimit, shërbimi sekret kishte planifikuar “të mbyllte udhët në urë ndërsa jahti afrohej”. E paqartë është çfarë masa u morën në Yosemite, por vizita ndodhi. Asnjë detaj arrestimi nuk u dha.
Shumë nga vizitat e Mbretëreshës në SHBA, përfshirë atë në vitin 1983, erdhën gjatë tensioneve të ngritura mes telasheve në Irlandën Veriore.
Para një vizite personale të saj në Kentucky më 1989, një dokument i brendshëm i FBI-së lexonte “mundësia për kërcënime kundër Monarkisë Britanike është gjithmonë e pranishme nga Ushtria Republikane Irlandeze (IRA)”.
© KOHA.
