Një person ka mbetur i vrarë dhe katër të tjerë janë plagosur pasi një burrë ka shtënë me armë pranë një objekti mjekësor në qendër të Atlantas në Gjeorgji, raportoi të mërkurën CNN-i.
Policia ka njoftuar se viktima ka vdekur në vendngjarje, ndërsa katër gratë e tjera janë duke u trajtuar në spital.
Siç bëhet e ditur, gratë janë qëlluar në dhomën e pritjes së qendrës mjekësore.
Autoritetet janë ende në kërkim të të dyshuarit, i identifikuar si 24-vjeçari Deion Patterson.
Sipas dëshmitarëve, i dyshuari ishte duke vizituar objektin mjekësor me nënën e tij, e cila aktualisht po ndihmon policinë në kërkim.
