-
Nga:
Associated Press
- 12 prill 2023 00:32
- Shpërndaje në:
Autoritetet kanë njoftuar se kufijtë janë vendosur për shkak të përzierjes gjinore ose për shkak se gratë dyshohet se nuk mbajnë hixhabin, ose shaminë islame, siç duhet. Ndalimi i ngrënies në natyrë zbatohet vetëm për objektet në Herat, ku ambiente të tilla mbeten të hapura për burrat.
Talebanët i kanë ndaluar familjet dhe gratë nga restorantet me kopshte ose hapësira të gjelbra në provincën veriperëndimore Herat të Afganistanit, ka bërë të ditur një zyrtar. Lëvizjet kanë pasuar me ankesa nga studiues fetarë dhe anëtarë të publikut për përzierjen e gjinive në vende të tilla.
Ishte i fundit në një mori kufizimesh të vendosura nga talebanët që kur morën pushtetin në gusht të vitit 2021. Ata e kanë ndaluar shkollimin për vajzat përtej klasës së gjashtë dhe gratë nga universitetet, shumica e llojeve të punësimit, duke përfshirë edhe punët në Kombet e Bashkuara. Ato gjithashtu janë të ndaluara nga hapësirat publike si parqet dhe palestrat.
Autoritetet kanë njoftuar se kufijtë janë vendosur për shkak të përzierjes gjinore ose për shkak se gratë dyshohet se nuk mbajnë hixhabin, ose shaminë islame, siç duhet.
Ndalimi i ngrënies në natyrë zbatohet vetëm për objektet në Herat, ku ambiente të tilla mbeten të hapura për burrat. Baz Mohammad Nazir, zëvendëszyrtar nga Drejtoria e Ministrisë talebane për virtytin në Herat, i ka mohuar raportimet e mediave se të gjitha restorantet ishin të ndaluara për familjet dhe gratë, duke i hedhur poshtë raportimet e duke i quajtur propagandë.
Ai u shpreh vetëm për restorantet me zona të gjelbra, si për shembull një park, ku mund të takoheshin burrat dhe gratë, ka sqaruar ai. “Pas ankesave të përsëritura nga studiues dhe njerëz të thjeshtë, ne vendosëm kufij dhe mbyllëm këto restorante”.
Azizurrahman Al Muhajir, i cili është kreu i Drejtorisë së Ministrisë talebane për virtytin në Herat, është shprehur se: “Ishte si një park, por ata e quajtën restorant dhe burra e gra ishin bashkë. Shyqyr Zotit është korrigjuar tani. Gjithashtu, auditorët tanë janë duke vëzhguar të gjitha parqet ku shkojnë burra dhe gra”.
Nazir i ka mohuar gjithashtu raportet se shitjet e DVD-ve të filmave të huaj, shfaqjeve televizive dhe muzikës janë të ndaluara në provincë, duke thënë se pronarët e bizneseve u këshilluan të mos e shisnin këtë material sepse binte ndesh me vlerat islame.
Tregtarët, që nuk ndoqën këshillën, përfundimisht i panë dyqanet e tyre të mbyllura, ka shtuar Nazir. Ai mohoi edhe raportet e mediave lokale se kafenetë e internetit janë mbyllur në Herat, por ka thënë se arkadat e lojërave tani janë të ndaluara për fëmijët për shkak të përmbajtjes së papërshtatshme. Disa lojëra fyen Qabenë, strukturën në formë kubi në Xhaminë e Madhe në Mekë drejt së cilës myslimanët kthehen kur falen dhe simbole të tjera islame.
“Internet-kafetë, ku studentët mësojnë dhe i përdorin për studimet e tyre, janë të nevojshme dhe ne i kemi lejuar ato”, ka shpjeguar Nazir.
