Një traget në jug të Filipineve është përfshirë nga zjarri, duke shkaktuar vdekjen e të paktën 31 personave nga rreth 250 pasagjerë dhe anëtarë të ekuipazhit sa ishin prezentë, raporton agjencia AP.

Zjarri zgjati për afro tetë orë.

Shumica e mbi 200 personave që i shpëtuan zjarrit kërcyen nga trageti “MV Lady Mary Joy 3” dhe u nxorën nga uji nga rojat bregdetare, nga marina dhe nga peshkatarët lokalë, raporton agjencia AP.

Guvernatori i provincës jugore Basilan, Jim Hataman, ka thënë se ende po kërkohen edhe shtatë persona që rezultojnë të zhdukur.

Hataman tha se trupat e 18 prej 31 viktimave u zbuluan te një kabinë e pasagjerëve.

“Këto viktima vdiqën në anije shkaku i zjarrit”, ka thënë Hataman.

Ai tha se më shumë njerëz mund të kenë qenë në traget, porse nuk janë regjistruar.

Kapiteni i tragetit, i ka thënë zyrtarëve të rojës bregdetare se ai u përpoq ta dërgonte tragetin e djegur në bregun më të afërt për të lejuar që më tepër njerëz të jetojnë.