Autoritetet ruse kanë akuzuar Ukrainën se e ka sulmuar Rusinë me dron.
Sipas njoftimit, droni u rrëzua në qytetin e Kireyeveskut, rreth 400 kilometra larg kufirit me Ukrainë, shkruan BBC.
Mediat shtetërore ruse raportojnë se të paktën tre persona u plagosën nga shpërthimi.
Ukraina më herët ka hedhur poshtë pretendimet se ka sulmuar objektivat me civilë rusë me dronë shpërthyes dhe nuk ka komentuar ende për këtë incident.
Autoritetet ruse të zbatimit të ligjit thonë se droni që thuhet se është një UAV i tipit Strizh (Tu-141) i mbushur me eksploziv u rrëzua në orën 15:20 me kohën lokale të dielën duke shkaktuar një zjarr të madh.
Raportohet se disa apartamente janë dëmtuar në qytet.
Në një deklaratë në Telegram, Ministria ruse e Mbrojtjes akuzoi Ukrainën për përpjekje për të kryer sulm.
Në dhjetor, Moska tha se tre pjesëtarë të personelit të forcave ajrore ruse vdiqën pasi u plagosën nga mbetjet e një droni që u rrëzua në bazën ajrore Engels në jug të vendit.
© KOHA. Të gjitha të drejtat janë të rezervuara.
