Mediat shtetërore ruse kanë raportuar se presidenti i Rusisë, Vladimir Putin, ka bërë një vizitë të papritur në Mariupol – qytet port ukrainas i pushtuar nga forcat ruse pasi ata e shkatërruan pjesën më të madhe të tij, raportoi të dielën BBC-ja.
Një video zyrtare tregon Putinin duke drejtuar një veturë nëpër rrugë gjatë natës dhe duke folur me banorët vendas.
Kjo do të ishte vizita e parë e Putinit në një territor ukrainas të okupuar. Sipas agjencisë së lajmeve Tass, ai udhëtoi atje me helikopter.
Në video ai është në veturë me zëvendëskryeministrin rus Marat Khusnullin, i cili shpjegon se si po rindërtohet qyteti.
Putini gjithashtu raportohet se vizitoi Sallën e Filarmonisë, e cila u përdor për të organizuar gjyqe të mbrojtësve të fabrikës së hekurit dhe çelikut Azovstal, një kompleks i madh industrial ku trupat ukrainase u mbajtën përpara se përfundimisht të dorëzoheshin.
Mariupoli ka qenë nën pushtimin rus për më shumë se 10 muaj pasi u shkatërrua në një nga betejat më të gjata dhe më të përgjakshme të konfliktit. Ukraina thotë se më shumë se 20 mijë njerëz u vranë atje.
Analiza e Organizatës së Kombeve të Bashkuara vlerëson se 90 për qind e ndërtesave u dëmtuan dhe rreth 350,000 njerëz u detyruan të largoheshin.
Të shtunën, Putin bëri një vizitë të paparalajmëruar në Krime, për të shënuar përvjetorin e nëntë të aneksimit të territorit nga Rusia nga Ukraina.
Autoritetet e Kievit janë zotuar të çlirojnë të gjitha territoret e pushtuara nga Rusia, përfshirë Krimenë, e cila u aneksua nga Rusia në 2014.
© KOHA.
