Ministri ukrainas i Mbrojtjes, Oleksii Reznikov, ka thënë se Rusia po përgatit një ofensivë të re të madhe dhe paralajmëroi se ajo mund të fillojë më 24 shkurt.
Reznikov ka thënë se Moska ka grumbulluar tashmë mijëra trupa dhe mund të "provojë diçka" për të shënuar përvjetorin e pushtimit vitin e kaluar, raportoi BBC-ja të mërkurën.
Sulmi do të shënonte gjithashtu Ditën e Mbrojtësit të Atdheut të Rusisë më 23 shkurt.
Reznikov ka thënë se Moska ka mobilizuar rreth 500,000 trupa për ofensivën.
Në shtator, presidenti rus, Vladimir Putin, njoftoi një mobilizim të përgjithshëm të rreth 300,000 trupave të rekrutuar, të cilat ai tha se ishin të nevojshëm për të siguruar "integritetin territorial" të vendit.
Por Reznikov sugjeroi se shifra e vërtetë e rekrutuar dhe e vendosur në Ukrainë mund të jetë shumë më e lartë.
“Zyrtarisht ata shpallën 300,000, por kur shohim trupat në kufi, sipas vlerësimeve tona është shumë më tepër”, ka deklaruar ai për rrjetin francez BFM.
Pavarësisht disa luftimeve të rënda në rajonin lindor të Donbasit, lufta ka hyrë në një ngërç në muajt e fundit që kur Ukraina rimori qytetin jugor të Khersonit.
Me përjashtim të pushtimit rus të qytetit Soledar, asnjëra palë nuk ka bërë përparime të mëdha territoriale.
Reznikov ka thënë se komandantët e Ukrainës do të përpiqen të "stabilizojnë frontin dhe të përgatiten për një kundërofensivë" përpara përparimit të përfolur rus.
© KOHA. Të gjitha të drejtat janë të rezervuara.
