Botë

Ushtria zgjat ngërçin politik në Birmani, shtyn zgjedhjet

Në dyvjetorin e grusht shtetit ndaj demokracisë në Birmani, aktivistët pro demokracisë kanë bërë thirrje kundër ushtrisë që tani mban kontrollin e shtetit. Junta ushtarake ka vrarë më shumë se 2 mijë e 900 protestues e opozitarë që kanë bërë thirrje për demokraci në Birmani

Aktivistët pro demokracisë në Birmani kanë mbajtur “grevën e heshtur” për të shënuar dyvjetorin e grusht shtetit ushtarak.

Protestuesit u kanë bërë thirrje qytetarëve që të qëndrojnë në shtëpi teksa bizneseve u kanë kërkuar që të mbyllen, të mërkurën.

Aktiviteti paqësor është mbajtur vetëm një ditë pasi Britania e Madhe, SHBA-ja, Kanadaja dhe Australia vendosën sanksione të reja kundër kompanive që kanë lidhje me ushtrinë e Birmanisë.

Ushtria ka njoftuar se Birmania po përballet me disa rrethana të pazakonta, duke hedhur në dyshim premtimin për mbajtje të zgjedhjeve sivjet.

Protesta kundër juntës ushtarake janë mbajtur para ambasadave të Birmanisë në Tajlandë dhe Japoni. Protestuesit kanë bërë thirrje kundër ushtrisë dhe kanë mbajtur fotografi të lideres së burgosur demokrate, Aung San Suu Kyi.

Një protestë e vogël në përkrahje të ushtrisë është mbajtur në Yangon. Vlerësohet se në këtë protestë ishin vetëm 200 persona.

Sipas organizatave monitoruese, më shumë se 2 mijë e 900 persona janë vrarë gjatë aksionit të juntës kundër disidentëve. 1 milion e gjysmë njerëz janë zhvendosur, ndërkaq 40 mijë shtëpi janë djegur. Është vlerësuar se tetë milionë fëmijë nuk shkojnë në shkollë dhe 15 milionë njerëz janë në rrezik nga kequshqyerja në Birmani.

Në këta dy vjet shteti ka qenë në luftë civile shumë brutale. Mirëpo ushtria vazhdimisht ka refuzuar të negociojë me opozitën, ashtu siç ka premtuar se do të takohej me shtetet fqinje menjëherë pas grusht shtetit.

Ushtria ka planifikuar zgjedhjet, mirëpo ka përjashtuar nga gara lideren e burgosur dhe partinë demokratike të saj.

Aktivistët pro demokracisë u kanë bërë thirrje birmanëve që të bojkotojnë çdo zgjedhje të organizuar nga ushtria. Kombet e Bashkuara kanë insistuar se zgjedhjet do të ishin të montuara nga junta ushtarake.

Ushtria gjatë kësaj jave ka pranuar se ka dështuar normalizimi i situatës dhe kjo mund ta detyrojë atë që të shtyjë zgjedhjet që pritej të mbaheshin në muajin gusht.

Kështu, ushtria zgjat ngërçin politik që ka bllokuar në tërësi Birmaninë.