Botë

Për katër javë, 60 mijë njerëz në Kinë vdiqën nga COVID-19

Gati 60 mijë njerëz kanë vdekur nga COVID-19 në Kinë në katër javët e fundit, kanë njoftuar autoritetet kineze të shtunën.

Kina është kapluar nga një valë e madhe e virusit pasi hoqi kufizimet “zero-COVID” në dhjetor, me disa qytete të mëdha që vlerësojnë se midis 70 dhe 90 për qind e popullsisë është e infektuar.

Raportet anekdotike dhe radhët e gjata në morgje dhe krematoriume tregojnë për një numër të lartë vdekjesh, por që nga java e kaluar autoritetet kishin regjistruar zyrtarisht vetëm disa dhjetëra vdekje nga COVID-19.

Mungesa e numrave realë është për shkak të përkufizimeve të rrepta se si vdekjet i atribuohen COVID-19. U numëruan vetëm njerëzit që vdiqën nga problemet me frymëmarrje.

Organizata Botërore e Shëndetësisë javën e kaluar kritikoi përkufizimin e ri si shumë të ngushtë dhe nënpërfaqësues të ndikimit real të epidemisë. Autoritetet kineze u përgjigjën se nuk ishte e nevojshme të atribuohej çdo vdekje te koronavirusi.

Sidoqoftë, Jiao Yahui nga Zyra e Administratës Mjekësore, njoftoi se në të vërtetë kishte 59.938 vdekje nga COVID-19 midis 8 dhjetorit dhe 12 janarit.

Në këtë numër përfshihen rreth 5500 të cilët vdiqën nga problemet me frymëmarrje, ndërsa të tjerë kishin edhe probleme shëndetësore. Mosha mesatare e atyre që vdiqën ishte 80 vjeç, ka thënë Jiao, dhe 90.1 për qind ishin të moshës 65 vjeç e lart.

Numri i vdekjeve të publikuar të shtunën përfshin vetëm ata që vdiqën në spital dhe ka të ngjarë të jetë akoma më i madh se totali aktual.

Jiao ka thënë se normat e rasteve po bien dhe kulmi ka kaluar në shumicën e zonave.

Qeveria kineze ka qenë objektiv i kritikave nga qeveritë e tjera dhe OBSH-ja për mungesën e transparencës së të dhënave. Ajo ka ndaluar publikimin e shumicës së të dhënave për infeksionet që nga fillimi i rritjes së rasteve. Disa vende kanë miratuar kufizime udhëtimi ose testime të detyrueshme të udhëtarëve nga Kina.