Një oficer policie në patrullë u sulmua dhe u dogj për vdekje nga protestuesit në rajonin peruan të Puno, ndërsa numri i të vdekurve nga demonstratat pas përmbysjes së ish-presidentit, Pedro Castillo u rrit në 47, sipas të dhënave zyrtare.
José Luis Soncco Quispe, 29 vjeç, ishte në patrullë me një oficer tjetër në Juliaca, të hënën në mbrëmje kur ata u sulmuan nga një turmë që më vonë i vuri flakën automjetit të tyre, sipas raporteve të policisë, raportoi Associated Press të mërkurën.
Partneri i Soncco në makinën e patrullës, Ronald Villasante Toque, tha se ata u sulmuan fizikisht nga rreth 350 protestues, sipas raporteve.
Villasante u dërgua në një spital në Lima me lëndime të shumta në kokë pasi u rrah. Ai tha se nuk ishte në dijeni të asaj që po i ndodhte kolegut të tij.
Kryeministri i Perusë, Alberto Otárola konfirmoi vdekjen e Soncco në një seancë të Kongresit, duke thënë se burrat u sulmuan nga protestuesit.
“Policia mbërriti në vendngjarje dhe zbuloi se një oficer ishte rrahur dhe lidhur, dhe tjetri, Luis Soncco Quispe, fatkeqësisht kishte vdekur. Ai u dogj i gjallë në makinën e tij të patrullës”, ka thënë ai.
Otárola njoftoi një shtetrrethim tre-ditor nga ora 20:00 deri në 4:00 të mëngjesit në Puno, dhe një ditë zie për të rënët.
