Një sugjerim i një prej ministrave të ardhshëm të Benjamin Netanyahut se mjekët izraelitë duhet të lejohen të refuzojnë trajtimin e pacientëve LGBTQI për arsye fetare, ka rritur frikën se Qeveria e re përbën një kërcënim të paprecedentë për të drejtat e homoseksualëve.
Presidenti izraelit, Isaac Herzog, ka dënuar retorikën në rritje anti-LGBTQI, duke thënë se ajo e shqetëson tej mase.
“Deklaratat raciste të ditëve të fundit kundër komunitetit LGBTQ dhe sektorëve të tjerë të publikut më bëjnë jashtëzakonisht të shqetësuar”, ka thënë Herzog, raportoi The Guardian të martën.
Presidenti, posti i të cilit është kryesisht ceremonial, por që zotëron një shkallë autoriteti, shtoi se një retorikë e tillë minon "vlerat demokratike dhe morale" izraelite.
Netanyahu i cili i quajti komentet e Strook “të papranueshme” – mohon se Qeveria e tij e re do të përbëjë një kërcënim për të drejtat e homoseksualëve, por kritikët thonë se ai është shumë i dobët për të kontrolluar partnerët e tij ultra nacionalistë dhe ultraortodoksë të koalicionit që e shtyjnë Izraelin të përvetësojë gjithnjë e më shumë atë që ata e shohin si trashëgimi fetare të shuguruar në mënyrë hyjnore.
Në një intervistë radiofonike të dielën, ministrja e ardhshme e misioneve kombëtare, Orit Strook, E Partisë Fetare Sioniste, la të kuptonte se mjekët izraelitë do të ishin në gjendje të refuzonin trajtimin për pacientët LGBTQI në frymën e legjislacionit që partia e saj po harton, dhe në përputhje me marrëveshjet e koalicionit që parashikojnë ndryshimin e një ligji kundër diskriminimit.
Strook specifikoi se një mjek mund të refuzojë kujdesin për një pacient nëse kjo gjë shkel bindjet e tij fetare "për sa kohë që ka mjaft mjekë të tjerë që mund ta ofrojnë këtë shërbim".
Pas kritikave të ashpra ndaj komenteve të saj, Strook, një udhëheqëse e komunitetit të kolonëve të paligjshëm izraelitë në Hebron, më vonë postoi në Twitter se ajo i ishte referuar procedurave mjekësore që do të ishin të kundërshtueshme nga ana fetare, jo individëve LGBTQI. Ajo nuk specifikoi se cilat procedura mund të ishin, por theksoi se ishte e paimagjinueshme të detyrohej një mjek hebre të shkelte ligjin hebre në një shtet hebre.
© KOHA. Të gjitha të drejtat janë të rezervuara.
