Biletat me aeroplan po shiten në masë të madhe në Rusi pasi presidenti Vladimir Putin njoftoi një mobilizim të pjesshëm ushtarak të mërkurën.
Në një fjalim të rrallë drejtuar kombit rus, Putini njoftoi mobilizimin e pjesshëm të menjëhershëm si pjesë e fazës tjetër të pushtimit të Ukrainës.
Pas njoftimit, biletat e aeroplanit po shiten në mënyrë të shpejtë ndërsa çmimet janë rritur shumë, sipas Reuters.
Fluturimet drejt vendeve që ende lejojnë rusët të hyjnë pa viza, duke përfshirë Turqinë, Armeninë, Gjeorgjinë dhe Serbinë, duket se janë shumë të kërkuara.
Linja ajrore shtetërore ruse Aeroflot nuk ka më fluturime për në Stamboll nga Moska për tre ditët e ardhshme, sipas faqes së saj të internetit.
Fluturimet e Aeroflot për në Jerevan nga kryeqyteti i Rusisë janë gjithashtu të shitura deri në fundjavë.
Platforma ruse e kërkimit të udhëtimeve Aviasales tregon se biletat për fluturimet që nisen për në Stamboll, Jerevan dhe Beograd, të mërkurën nuk ishin më të disponueshme, sipas faqes së saj të internetit.
Aviasales është uebfaqja më e njohur e Rusisë për blerjen e biletave të aeroplanit. Të dhënat e Google Trends menjëherë pas njoftimit treguan një rritje të kërkimeve për faqen e internetit, raportoi Reuters.
Bileta më e lirë për në Dubai nga Rusia është hiç më pak se pesë mijë dollarë. Në një situatë normale, bileta është gati trefish më lirë.
Rusët në rrjetet sociale kanë shprehur lumturinë e tyre për familjarët që ishin të aftë për luftë të cilët kanë mundur të ikin jashtë vendit para njoftimit.
Pas fjalimit të Putinit të mërkurën, ministri rus i Mbrojtjes, Sergei Shoigu, ka thënë se 300 mijë rusë do të thirren si pjesë e mobilizimit.
Vetëm rusët me përvojë të mëparshme ushtarake do t'i nënshtrohen mobilizimit, shtoi Shoigu, duke shtuar se rekrutët dhe studentët nuk do të jenë pjesë ende.
Kontratat e ushtarëve që tashmë luftojnë në Ukrainë gjithashtu do të zgjaten, thuhet në dekretin e nënshkruar nga Putini të mërkurën, sipas The Guardian.
Është e paqartë se sa rusë janë larguar nga vendi që nga fillimi i pushtimit të Putinit më 24 shkurt.
BE-ja ndaloi udhëtimin ajror nga Rusia pas nisjes së pushtimit të Ukrainës, por shumë rusë ende mund të gjejnë mënyra për të hyrë në BE, duke përfshirë edhe me rrugë tokësore përmes disa vendeve.
Katër nga pesë vendet e BE-së që kufizojnë Rusinë - Polonia, Estonia, Letonia dhe Lituania - filluan të largojnë rusët nga vendet e tyre këtë javë si pjesë e një serie sanksionesh.
© KOHA. Të gjitha të drejtat janë të rezervuara.
