Kryeministri izraelit Yair Lapid dhe presidenti turk Recep Tayyip Erdogan u takuan në margjinat e Asamblesë së Përgjithshme të OKB-së të martën në mbrëmje, duke shënuar herën e parë që liderët e të dy vendeve kishin folur ballë për ballë që nga viti 2008, ka thënë Zyra e Kryeministrit izraelit, transmeton AP. 

Dy liderët diskutuan për energjinë, e cila është kthyer në një fushë kyçe të bashkëpunimit pas përmirësimit të marrëdhënieve mes dy vendeve në muajt e fundit.

Lapid falënderoi Erdoganin për shkëmbimin e inteligjencës dhe vuri në dukje kërkesën e Izraelit për kthimin e katër shtetasve izraelitë, dy prej të cilëve janë ushtarë, të cilët janë zhdukur në Rripin e Gazës që nga viti 2014, sipas njoftimit nga Izraeli.

Për shkak të konfliktit për çështjen palestineze, marrëdhëniet midis Izraelit dhe Turqisë janë ftohur, megjithëse janë përmirësuar muajt e fundit dhe energjia është bërë një fushë kyçe e bashkëpunimit.

Turqia ka mbështetur prej kohësh lëvizjen islamike palestineze Hamas, e cila sundon Gazën dhe konsiderohet një organizatë terroriste nga pjesa më e madhe e Perëndimit.

Një marrëdhënie e tillë ka qenë shpesh një pikë grindjeje në përpjekjet për të rivendosur lidhjet midis Turqisë dhe Izraelit.

Ankaraja u zemërua nga vrasja e 10 aktivistëve turq gjatë përleshjeve që shpërthyen kur marinsat izraelitë sulmuan një anije që u përpoq të çante bllokadën detare të Izraelit në Rripin e Gazës.